ST Political Reservation: केंद्रीय सामाजिक न्याय राज्य मंत्री रामदास आठवले यांनी गोव्यातील एसटी समुदायाला विधानसभेत राजकीय आरक्षण मिळू शकत नाही, असे वक्तव्य केले. त्यावरून आता राज्यात राजकारण तापू लागले आहे.

आमदार विजय सरदेसाईंनंतर आता मिशन फॉर पॉलिटिकल रिझर्व्हेशन फॉर शेड्युल्ड ट्राईब्जच्या पदाधिकाऱ्यांनी पत्रकार परिषद घेत आपली भूमिका मांडली.

आठवलेंच्या वक्तव्यामुळे समाजाच्या भावना दुखावल्या गेल्या आहेत. त्यामुळे मंत्री रामदास आठवले आणि राज्याचे मुख्यमंत्री प्रमोद सावंत तसेच राज्य भाजपने याबाबत माफी मागावी, अशी मागणी पत्रकार परिषदेत करण्यात आली.

मिशन फॉर पॉलिटिकल रिझर्व्हेशन फॉर शेड्युल्ड ट्राईब्जचे जनरल सेक्रेटरी रूपेश वेळीप म्हणाले की, एसटी आरक्षणाविषयी केलेल्या वक्तव्याबाबत केंद्रीय मंत्री आठवले, मुख्यमंत्री सावंत आणि भाजपने माफी मागावी.

आठवले यांना हे वक्तव्य करण्यास कोणी भाग पाडले, याचा खुलासा त्यांनी करावा. आम्ही संख्येने कमी असू पण आम्ही उत्तर आणि दक्षिण गोव्यातील लोकसभा निवडणुकीवेळी आमची ताकद दाखवून देऊ. राज्याच्या मुख्यमंत्र्यांनी याबाबत त्यांची भूमिका स्पष्ट केली पाहिजे, असेही ते म्हणाले.