किशोर पेटकर

Goa Chess Association गोवा क्रीडा प्राधिकरणाच्या सेवेत सध्या फक्त तीनच बुद्धिबळ प्रशिक्षक आहेत. त्याकडे लक्ष वेधत गोवा बुद्धिबळ संघटनेच्या नवीन कार्यकारिणीने क्रीडामंत्री गोविंद गावडे यांच्याकडे राज्यात सुव्यवस्थित बुद्धिबळ प्रशिक्षण व्यवस्थेची गरज असल्याचे सांगितले. त्या अनुषंगाने योग्य ती उपाययोजना करण्याची ग्वाही क्रीडामंत्र्यांनी शिष्टमंडळाला दिली.

गोवा बुद्धिबळ संघटनेचे अध्यक्ष महेश कांदोळकर, सचिव आशेष केणी, खजिनदार विश्वास पिळर्णकर व इतर पदाधिकारी उपाध्यक्ष अरविंद म्हामल, दामोदर जांबावलीकर, सत्यवान हरमलकर, संयुक्त सचिव कालिदास हरवळकर, अमोघ नमशीकर, तसेच सत्तरी संघटनेचे गिरीश गाडगीळ यांचा समावेश असलेले शिष्टमंडळ क्रीडामंत्री गावडे यांना भेटले.

गोवा बुद्धिबळ संघटनेच्या वतीने महेश कांदोळकर यांनी क्रीडामंत्र्यांसमोर राज्य बुद्धिबळास भेडसावणाऱ्या समस्या मांडल्या. राज्यातील बाराही तालुक्यात किमान एक बुद्धिबळ प्रशिक्षक आवश्यक असून पणजी बुद्धिबळ प्रशिक्षण केंद्र सुरू करण्याची मागणी केली.

संघटनेचे अनुदान गोवा क्रीडा प्राधिकरणाकडे रखडले आहे. त्यावर तोडगा काढावा अशी विनंतीही क्रीडामंत्र्यांना करण्यात आली. यासंदर्भात योग्य तोडगा काढण्याचे आश्वासन मंत्री गावडे यांनी दिले.