Goa Chess Association Election गोवा बुद्धिबळ संघटना कार्यकारी समितीच्या पाच जागांसाठी रविवारी झालेल्या निवडणुकीत राज्यसभा खासदार विनय तेंडुलकर, संघटनेचे माजी सचिव किशोर बांदेकर व त्यांचा गट पराभूत झाला.

बारापैकी सात तालुका संघटनांची एकजूट अबाधित राहिली व तीच अखेरीस निर्णायक ठरली. अकरा पदांवर या गटाला स्थान मिळाले.

राज्यसभेतील मुदत संपत आलेल्या खासदार तेंडुलकर यांना पुन्हा एकदा गोवा बुद्धिबळ संघटनेचे अध्यक्ष बनणे शक्य झाले नाही.

यापूर्वी ते 2013-17 या कालावधीसाठी अध्यक्ष होते. रविवारी पणजीत झालेल्या निवडणुकीत अध्यक्षपदाचे उमेदवार तिसवाडीचे महेश कांदोळकर यांना 14 मते मिळाली व ते विजयी झाले.

धारबांदोडा तालुक्याचे प्रतिनिधित्व करणारे खासदार तेंडुलकर यांना सहाच मते मिळाली. बारा तालुका संघटनांतील प्रत्येकी दोघा प्रतिनिधींना मतदानाचा हक्क होता.

निवडणूक पीठासीन अधिकारी प्रभाकर तिंबले यांच्या मार्गदर्शनाखाली निवडणूक प्रक्रिया झाली. त्यांना गोवा बुद्धिबळ अस्थायी समितीचे सहकार्य लाभले. सात उमेदवार ऑगस्ट 2021मधील निवडणूक प्रक्रियेत बिनविरोध ठरले होते.

सचिवपदी सासष्टीचे आशेष केणी निवडून आले. त्यांनी काणकोणच्या शरेंद्र नाईक यांचा 14-6 मतफरकाने पराभव केला. याच फरकाने बार्देशच्या विश्वास पिळर्णकर यांनी खजिनदारपदासाठी मुरगावचे किशोर बांदेकर यांना हरविले. दक्षिण गोवा संयुक्त सचिवपदाच्या दोन जागांसाठी तीन उमेदवार रिंगणात होते.

फोंड्याचे अमोघ नमशीकर यांना सर्वाधिक 14 मते मिळाली, तर सांगेचे किशोर गावस देसाई यांना सहा मते मिळाली.

2021-2025 या कालावधीसाठी निवडणून आलेल्या कार्यकारी समितीत गावस देसाई हे प्रतिस्पर्धी गटातील एकमेव उमेदवार आहेत. केपे तालुक्याचे समीर नाईक यांना चार मते मिळाल्याने ते पराभूत झाले.