Goa speaker Ramesh Tawadkar

गोवा विधानसभेचे सभापती रमेश तवडकर यांनी काणकोणमध्ये श्रम धाम उपक्रमांतर्गत गरजू लोकांसाठी 20 घरे बांधून दिली आहेत. सभापती आता या उपक्रमांतर्गत महाराष्ट्रातील अनाथ भावंडांना घर बांधून देणार आहेत.

सांगली, मिरजमधील आरग गावात अनाथ आणि बेघर झालेल्या भावंडांसाठी सभापती घर बांधून देणार असल्याचे त्यांनी सांगितले आहे.

आरग ग्रामपंचायतीचे सरपंच एस. एस. नाईक यांनी याबाबत सभापती तवडकर यांच्याकडे पत्राद्वारे अनाथ भावंडांसाठी घराची मागणी केली होती.

मौजे आरग ता. मिरज येथील रहिवाशी शिवा विष्णू पवार व ओम विष्णू पवार ही दोन मुले अनाथ झाली आहेत. त्यांचे वडील विष्णू मारुती पवार यांचे डिसेंबर 2018 आणि आई राजश्री पवार यांचे फेब्रुवारी 2019 रोजी निधन झाले.

अचानक आलेल्या या संकटामुळे त्यांची आर्थिक व मानसिक स्थिती खालावलेली आहे. त्यांना स्वतःची जागा आहे परंतु राहणेसाठी घर नाही. त्यांची आर्थिक परिस्थितीमुळे बेताची असल्यामुळे त्यांना घर बांधणे शक्य नाही. आपल्या मार्फत सदर अनाथांना घर बांधून मिळावे, अशी मागणी सरपंच नाईक यांनी केली होती.

दरम्यान, सभापती तवडकरांनी मनाचा मोठेपणा दाखवत यासाठी सकारात्मक प्रतिसाद दिला आहे. तवडकर यांनी स्वत: मिरजेत जाऊन श्रमदानाच्या माध्यमातून अनाथ भावंडांना घर बांधून दिले जाईल, असे आश्वासन दिले.

विविध सामाजिक संस्था आणि दानशूर व्यक्तींकडून त्यांना मदत मिळेल यासाठी प्रयत्न करेन, असेही तवडकर म्हणाले.

सभापती रमेश तवडकरांनी त्यांच्या मतदारसंघात गरजूंना 20 घरे बांधून दिली. गेल्यावर्षी लोकसभा अध्यक्ष ओम बिर्ला यांच्या हस्ते या घर मालकांना सुपूर्द करण्यात आली.