Goa Congress: आगामी लोकसभा निवडणुकांच्या पार्श्वभूमीवर सर्वच पक्षांनी मोर्चेबांधणीला सुरुवात केली असून गोव्यातही सत्ताधारी भाजपसह विरोधी पक्षानेही तयारी सुरु केली असल्याची दिसून येतेय.

दक्षिण गोव्यात काँग्रेस कार्यालयामध्ये अखिल भारतीय काँग्रेस कमिटी निरीक्षक मधुसूदन मिस्त्री यांनी स्क्रीनिंग कमिटीची बैठक घेतली असून ते काँग्रेस नेत्यांशी व्यक्तिशः बातचीत करत आहेत.

यावेळी सदस्य सूरज हेगडे आणि शफी पारंबिल यांनी आज शनिवारी मडगाव येथे काँग्रेसच्या विविध नेत्यांची आणि कार्यकर्त्यांची भेट घेतल्याचे समजतेय.

आज त्यांनी गोवा प्रदेशाध्यक्ष अमित पाटकर, युरी आलेमाओ, क्वेपेम आमदार अल्टोन डीकोस्टा, कार्लोस फेरेरा, दक्षिण गोव्याचे खासदार फ्रान्सिसो सरधिना, गिरीश चोडणकर तसेच संघटना प्रमुख आणि इतर प्रमुख नेत्यांशी त्यांनी चर्चा केल्याचे वृत्त प्राप्त झाले आहे.

सध्या राज्यात चाललेले पक्षाचे काम, आगामी लोकसभा निवडणुकीची तयारी तसेच संभाव्य उमेदवाराबाबतही एआयसीसी निरीक्षकांनी आमच्याकडून आढावा घेतल्याचे अमित पाटकर यांनी सांगितले.

दरम्यान दक्षिण गोव्यातील निवडणुकीसाठी इच्छुकांपैकी एल्व्हिस गोम्स यांच्याशी संपर्क साधला असता त्यांनी "मला या बैठकीची माहिती देण्यात आलेली नाही" असे सांगितले आहे.

काही दिवसांपूर्वी 'आप'चे अरविंद केजरीवाल यांनी गोव्यात येऊन आगामी लोकसभा निवडणुकीच्या पार्श्वभूमीवर राज्यातील तयारीचा आढावा घेतला होता.

तसेच राज्यातील पक्षाचे आमदार, प्रदेशाध्यक्ष आणि वरिष्ठ नेते यांच्याशीही त्यांनी चर्चा केली होती.

गोव्यात मोठी पोकळी निर्माण झाली असून गोव्यात 'आप'शिवाय पर्याय नाही असे वक्तव्य अरविंद केजरीवाल यांनी केले आहे.