Varca Beach वार्का समुद्रकिनारी जाण्यासाठी असलेल्‍या वाटेवरचा वाळूचा पट्टा कापून रस्‍ता तयार केल्‍याचे काम उघडकीस आल्‍यानंतर आज स्‍थानिक पंचायतीने पोकलेन वापरून ही कापून काढलेली वाळू पुन्हा पूर्वस्‍थितीत आणण्‍याचे काम सुरू केले. कुणीतरी अज्ञात व्यक्तीने हे बेकायदेशीर काम केले होते.

कालच वार्काच्‍या ग्रामस्थांनी ही बाब पंचायत मंडळाच्या निदर्शनास आणून दिली होती. यासंबंधी पत्रकारांशी बोलताना बाणावलीचे आमदार वेन्‍झी व्‍हिएगस यांनी पंचायतीचे या कामाबद्दल कौतुक केले.

ते म्हणाले गोव्याच्या इतिहासात ही पहिलीच वेळ आहे की, एखाद्या पंचायतीने तक्रारीनंतर 24 तासांत वाळूचे पट्टे पूर्वस्‍थितीत आणण्‍याचे काम हाती घेतले असावे.

वार्का पंचायतीने या कामातून लोकप्रतिनिधींसमोर आदर्श ठेवला आहे आणि आपण विधानसभा अधिवेशनात हा प्रश्न उपस्थित केला होता, असेही त्‍यांनी सांगितले. पंचसदस्‍य रोलंड फर्नांडिस म्हणाले, आम्ही सर्व संबंधित विभागांशी संपर्क साधून हे काम सुरू केले आहे. जे घडले ते पर्यावरणाला हानीकारक होते.