Goa: धनगर समाजाला अजूनही अनुसूचित जमातीचा व आदिवासी दर्जा मिळालेला नाही. गोव्यातही धनगर समाजाबाबत हाच प्रश्र्न कायम आहे. यावेळच्या लोकसभा अधिवेशनात मला बोलण्याची संधी मिळाली. मी अनेक प्रश्र्नांवर केंद्र सरकारचे लक्ष वेधले, अशी माहिती दक्षिण गोव्याचे खासदार फ्रान्सिस सार्दिन यांनी काल पत्रकार परिषदेत दिली.

धनगर समाजाला अनुसूचित जमातीचा दर्जा देण्यासंदर्भात केंद्रीय मंत्री अर्जुन मुंडा यांच्याकडे मागणी केली. खासदार सुप्रिया सुळे यांनीसुद्धा आपल्याला पाठिंबा देताना महाराष्ट्रातही धनगर समाजाला हा दर्जा देण्याची मागणी केली. केंद्रीय मंत्री मुंडा यांनी या समाजाचा अनुसूचित जमातीत समावेश करू, अशी ग्वाही दिली. मात्र, आदिवासी दर्जा देण्यासंदर्भात ठोस आश्र्वासन दिले नसले तरी आपण यावर सकारात्मक विचार करू, असे ते म्हणाले.

पश्र्चिम बगल रस्ता खांबावर उभारावा, याकडेही लोकसभेचे लक्ष वेधले. बाणावली व कोलवा येथील नागरिकांना हा रस्ता खांबावर हवा आहे हे केंद्रीय मंत्री नितीन गडकरी यांच्या निदर्शनास आणून दिले. पावसाळ्यात या परिसरात पूरस्थिती निर्माण होते, हेही त्यांना सांगितले.