पणजी: मतदारयादीच्या विशेष सखोल पुनरावलोकनात (एसआयआर) राज्यातील अल्पसंख्याकांना लक्ष्य करण्यात आलेले नाही, असा स्पष्ट दावा मुख्यमंत्री प्रमोद सावंत यांनी सोमवारी केला. एसआयआरवरून विरोधकांकडून करण्यात येणारे आरोप तथ्यहीन असून, निवडणुकीतील पराभवानंतर काँग्रेसकडून निवडणूक आयोगासारख्या घटनात्मक संस्थांना बदनाम करण्याचा प्रयत्न केला जात असल्याची टीकाही त्यांनी केली.

आल्तिनो येथील शासकीय निवासस्थानी आयोजित पत्रकार परिषदेत सावंत यांनी एसआयआरवरून सुरू असलेल्या वादावर भाष्य केले. निवडणूक आयोगाने प्रसिद्धीपत्रकाद्वारे दिलेल्या स्पष्टीकरणाचा संदर्भ देत, एसआयआरसह संबंधित निर्णय सर्व निवडणूक आयुक्तांच्या संमतीने घेण्यात आल्याचे त्यांनी सांगितले.

पराभवानंतर काँग्रेसकडून आयोगाला दोष

निवडणुकीत पराभव झाल्यानंतर काँग्रेसकडून निवडणूक आयोगाला दोष देण्याची पद्धत आहे. यापूर्वी काँग्रेसने इलेक्ट्रॉनिक मतदान यंत्रांवर (ईव्हीएम) प्रश्न उपस्थित करून त्यांना ‘ब्लॅक बॉक्स’ म्हटले होते. मात्र, हिमाचल प्रदेश, कर्नाटक, तेलंगणा आणि केरळमध्ये काँग्रेस विजयी झाल्यानंतर त्याच ईव्हीएमच्या वापराबाबत पक्षाने आक्षेप घेतला नाही, असे ते म्हणाले.

जिल्हा पंचायत निवडणुकीवेळी विरोध का नाही?

गोव्यात जिल्हा पंचायत निवडणुकीत मतपत्रिकांचा वापर झाला होता. त्या निवडणुकीत काँग्रेसचा पराभव झाला, याकडेही सावंत यांनी लक्ष वेधले. त्यामुळे केवळ निवडणूक आयोग किंवा मतदान पद्धतीला दोष देणे योग्य नाही, असे त्यांनी नमूद केले.