Bicholim: खाण व्यवसाय सुरळीतपणे सुरू करण्यास सहकार्य करा, असे साकडे ‘वेदांता’ने सामावून घेतलेल्या पूर्वाश्रमीच्या सेझा कामगारांनी शिरगाव पंचायतीला घातले आहे. डिचोली खाण ब्लॉकची बोलीदार असलेल्या वेदांता कंपनीने खाण व्यवसाय सुरू करण्यासाठी वेदांता कंपनीने जोरदार तयारी सुरू केली असून, पूर्वाश्रमीच्या सेझाच्या ९३ कामगारांना सेवेत सामावून घेतले आहे.

सेवेत सामावून घेतलेले पूर्वाश्रमीचे सेझाचे ९३ कामगार आता पंचायतींकडून पाठिंबा मिळविण्यासाठी प्रयत्नरत आहेत. आत्माराम तिळवे यांच्या नेतृत्वाखाली मंगळवारी या कामगारांनी शिरगाव पंचायतीत जाऊन सरपंच करिश्मा गावकर यांच्यासह सूर्यकांत पाळणी आणि वेदिका शिरगावकर यांची भेट घेऊन त्यांच्यासोबत चर्चा करून खाण व्यावसाय सुरू करण्यास पंचायतीने सहकार्य करावे, अशी मागणी केली.

सकारात्मक प्रतिसाद

सरपंच गावकर आणि इतर पंचसदस्यांकडून सकारात्मक प्रतिसाद मिळाला असल्याची माहिती या कामगारांनी दिली. डिचोली खाण ब्लॉकअंतर्गत येणाऱ्या भागातील बेरोजगारीचा प्रश्न सुटण्यासाठी खाण व्यवसाय सुरू होणे अत्यावश्यक आहे, असे मत पंचसदस्य सूर्यकांत पाळणी यांनी व्यक्त केले.

तसेच त्यांनी कामगारांना सेवेत सामावून घेतल्याबद्दल वेदांता कंपनीसह कामगारांचेही अभिनंदन केले आहे, अशी माहिती कामगारांनी दिली.