मडगाव: मनोहर पर्रीकर मुख्यमंत्री असताना दयानंद निराधार योजनेखाली ज्येष्ठ नागरिकांना पेन्शन दिले जायचे. हे पैसे प्रत्येक महिन्याच्या सात तारखेला ज्येष्ठ नागरिकांच्या खात्यात जमा व्हायचे. मात्र आताचे राज्य सरकार हे पेन्शन पाच सहा महिने अडकवून ठेवते आहे.

(goa senior citizens pension misused alleges Vijai Sardesai)

ज्येष्ठ नागरिकांप्रती दाखविलेली सरकारची ही असंवेदशीलता असल्याचा आरोप त्यांनी केला. जागतिक ज्येष्ठ नागरिक दिनानिमित्त आज मडगाव येथे आयोजित केलेल्या कार्यक्रमात सरदेसाई बोलत होते. या सरकारच्या समाजकल्याण खात्याला ज्येष्ठ नागरिकांप्रती काहीच वाटत नाही. असा ही आरोप त्यांनी केला.

ज्येष्ठ नागरिकांच्या पेन्शनचे पैसे कंत्रादारांची बिले फेडण्यासाठी वापरले जातात. कारण या कंत्रादारांकडून काही जणांना कमिशन मिळते. त्यासाठीच ज्येष्ठांची परवड केली जाते, असा आरोप सरदेसाई यांनी केला. समाजकल्याण खात्यावर ताशेरे ओढताना सरदेसाई म्हणाले, वृद्धाश्रमात काहींचा पगार चार हजारावरुन अडीच हजारावर आणण्याचे ठरले आहे, आणि साफसफाई करणाऱ्यांना अडीच हजार मानधन मिळत होते ते दीड हजारांवर आणू पाहत आहे.

एका बाजूने महागाई वाढत असताना मानधन वाढविण्याचे सोडून हे सरकार त्यांचा पगार कमी करू पाहत आहे. तर दुसऱ्या बाजूने मंत्र्यांच्या वाशिल्याच्या माणसांची सरकारी नोकर म्हणून भरती करून बेकार रहाणाऱ्या कामगारांची फौज तयार करत असल्याचा आरोप त्यांनी केला. यावर विजय सरदेसाई यांना कसे प्रतिउत्तर मिळते हे पाहणे महत्त्वाचे ठरणार आहे.