पणजी: राज्यभरात शाळा सुरू झाल्या. मे महिन्यातील सुट्टीनंतर शाळेच्या पहिल्या दिवशी अनेक शाळांत विद्यार्थ्यांची उपस्थिती समाधानकारक होती. शिक्षकांकडून विद्यार्थ्यांचे औक्षण करून स्वागत करण्यात आले. तर दुसरीकडे काही भागांतील शाळांची दुरुस्ती अजूनही सुरू असल्यामुळे तेथे त्या बंदच आहेत. याबाबत पालकांसह विद्यार्थ्यांमधून नाराजीसह संताप व्यक्त केला जात होता.

महिनाभराच्या सुट्टीनंतर नियमित वर्ग

४ जूनपासून गोव्यातील शाळा सुरू झाल्या आणि शाळेच्या पहिल्याच दिवशी मुलांचे मुसळधार पावसाने स्वागत केले. महिनाभराच्या सुट्टीनंतर सर्व वर्ग नियमितपणे सुरू झाले. यापूर्वी, सहावी ते दहावी आणि बारावीचे वर्ग ७ एप्रिल रोजीच सुरू झाले होते, तर पहिली ते पाचवी आणि अकरावीचे वर्ग सुट्ट्यांसाठी बंद ठेवण्यात आले होते. शैक्षणिक नववर्ष प्रारंभ झाल्याने सर्व शाळा विद्यार्थ्यांच्या आगमनाने गजबजल्या.

पेडणेत ५ शाळांच्या छपरांची कामे पूर्ण

पेडणे तालुक्यात ज्या सरकारी शाळांच्या छप्पर व अन्य दुरुस्ती नुकतीच झाली किंवा व्हायची आहे, अशा तालुक्यातील पाच शाळांच्या इमारतींपैकी तीन शाळांतील विद्यार्थ्यांची जवळच्या परिसरात सोय करण्यात आली. तर दोन शाळांची त्याच शाळांच्या इमारतीत सोय करण्यात आली.

गुंडेलवाडा-वेळूस शाळेची दुरुस्ती रखडली

रकार लाखो रुपये खर्च करते. मात्र, ज्या ठिकाणी खरीच गरज असते त्याठिकाणी त्यांचे दुर्लक्ष होते.अशीच अवस्था वाळपई नगरपालिका प्रभाग २ मध्ये असलेल्या गुंडेलवाडा-वेळूस-वाळपई येथील सरकारी प्राथमिक शाळेची झालेली आहे.

या शाळेच्या छपराची दुरुस्ती महिनाभरापासून रखडल्यामुळे विद्यार्थ्यांना भर पावसात शिकण्याची वेळ आली आहे. शाळा सुरू होऊनही अद्याप दुरुस्तीचे काम सुरू झालेले नाही, यामुळे पालकांमध्ये तीव्र संताप व्यक्त होत आहे.

केरी-तळवाडात पालकांमध्ये भीती

तळवाडा येथील सरकारी प्राथमिक विद्यालयाच्या छपराचे काम पूर्ण झाले आहे. मात्र, अंतर्गत सगळी कामे अपूर्ण स्थितीत असून पालकांनी त्याचा पूर्णतः धसका घेतला आहे. त्यामुळे शाळेत विद्यार्थ्यांना पाठविणे धोक्याचे असल्याचे पालक-शिक्षक संघाचे अध्यक्ष दत्ताराम नाईक यांनी सांगितले.

या विद्यालयाचे छप्पर, वीज, प्रसाधन कक्ष, सिमेंट व रंगकाम आदी कामांपैकी केवळ छपराचे काम पूर्ण झाल्याचे चित्र आहे. यापैकी बांधकाम केलेल्या कामाचे सिमेंट, वीजकाम, रंगकाम, प्रसाधन कक्ष तसेच पूर्वीचे छपराचे साहित्य, कौले आदींची कामे अद्याप न केल्याने विद्यार्थ्यांना इजा झाल्यास जबाबदार कोण, असा प्रश्न अध्यक्ष नाईक यांनी केला आहे. तळवाडा विद्यालयाचा ताबा दीड महिन्यापूर्वी घेऊनही कंत्राटदार कामे पूर्ण करीत नसल्याने नाराजी व्यक्त केली.