Stray Cattle In Sattari सत्तरी तालुक्यातील विविध भागात दिवसें दिवस भटक्या गुरांची समस्या जटील होत चालली आहे. वाळपई शहरात, ग्रामीण भागात सकाळ रात्री रस्त्यावर भटकी गुरे आढळून येतात. वेळूस नगरगाव मुख्य रस्त्यावर, रात्रीच्यावेळी कदंब बस स्थानकासमोरील मुख्य रस्त्यावर गुरांचा कळप रस्त्यावर बसलेला असतो.

हा कळप वाहन चालकांना त्रासादायक ठरत आहे. विशेष म्हणजे वाळपईत मंगळवारच्या आठवडी बाजाराच्या दिवशी ग्राहक व व्यावसायिकांना मोकाटपणे फिरत असलेल्या गुरांचा त्रास होत असतो.

दर मंगळवारी हे नेहमीचेच चित्र बनले आहे. वाळपईत मंगळवारी रस्त्याच्या दोन्ही बाजूंनी व्यावसायिक दाटी वाटीने आपापली दुकाने थाटून बसलेले असतात. त्या गुरांचा फटका दुकानदारांना बसतो.

भटकी गुरे रस्त्यात मधूनच फिरत असतात. त्यावेळी फळ, पालेभाज्यांवर ताव मारतात. परिणामी व्यावसायिकांचा विक्रीसाठी आणलेला माल खराब होतो. अशा भटक्या गुरांना वारंवार व्यावसायिक, नागरिक हाकलत असतात.

वाळपई पालिकेने मंगळवारच्या बाजाराच्या दिवशी तरी अशा भटक्या गुरांना या बाजाराच्या जागेत जाता येणार नाही,असा उपाय हाती घेतला पाहिजे. पण त्या गुरांवर नियंत्रण आणण्यात पालिकेला अपयश आलेले आहे.

एखाद्यावेळी ग्राहकांनी खरेदी केलेल्या भाजी ही गुरे खाण्यासाठी धावतात. परिणामी ग्राहकांनाही नुकसान सोसावे लागते आहे. दोन मोकाट गुरे एकमेकांशी भांडतात, तेव्हांही लोकांना त्रास होतो.

वाळपई वेळूस येथे कदंब बसस्थानकासमोरच्या रस्त्यावर दररोज भटक्या गुरांचा कळप बसलेला असतो. भटक्या गुरांनी रस्त्यातच ठाण मांडल्याने अपघाताचे प्रकारही होत आहेत. त्यात गुरे जखमी होण्याच्या घटनाही घडतात.

एवढी गुरे येतात तरी कुठून ?

एवढ्या मोठ्या प्रमाणात भटकी गुरे येतात तरी कुठून हाच प्रश्न लोकांना पडला आहे. संबंधित गुरांचे मालक तरी कुठे असतात. हाही प्रश्न अनुत्तरीत आहे. रस्त्यावर अनेक प्रकारचा प्लास्टिक कचरा पडलेला असतो.

प्रसंगी अशी भटकी गुरे हे प्लास्टिक खातात. पण नंतर हळूहळू पोटात प्लास्टिक जमा होऊन गुरे दगावण्याचे प्रकार वाढलेले आहेत. गेल्या अनेक वर्षापासून प्लास्टिक खाल्याने मोकाट गुरे दगावण्याचे प्रकार वाढलेले आहेत.