CM Pramod Sawant: ‘मुख्यमंत्री देवदर्शन यात्रा’ योजनेअंतर्गत आज तिरुपतीला भाविक रवाना झाले. समाजकल्याण संचालनालयातर्फे आयोजित या रेल्वेला मुख्यमंत्री डॉ. प्रमोद सावंत यांनी आज हिरवा झेंडा दाखविला. या खात्याचे मंत्री सुभाष फळदेसाई असल्याने या योजनेचा मान त्‍यांच्‍या सांगे मतदारसंघातील लोकांना सर्वप्रथम प्राप्त झाला.

पहिल्या टप्प्यात एक हजार भाविकांना संधी प्राप्त झाली आहे. या चार दिवसांच्या दौऱ्यासाठी सरकार प्रत्येक भाविकावर 10,500 रुपये खर्च करणार असून हा दौरा आयआरसीटीसीतर्फे आयोजित केला आहे.

योजना शुभारंभ कार्यक्रमाला सार्वजनिक बांधकाममंत्री नीलेश काब्राल, समाजकल्याणमंत्री सुभाष फळदेसाई, मडगावचे आमदार दिगंबर कामत, वास्कोचे आमदार कृष्णा साळकर, नुवेचे आमदार आलेक्स सिक्वेरा, सांताक्रुझचे आमदार रुडॉल्‍फ फर्नांडिस, जिल्हा पंचायत दक्षिण गोवा अध्यक्ष सुवर्णा तेंडुलकर, समाजकल्‍याण खात्याच्या संचालक संध्या कामत व रेल्वे अधिकारी उपस्थित होते.

सरकारी योजना लोकांपर्यंत पोहोचविणे हे सरकारचे कर्तव्य असल्याचे मंत्री फळदेसाई म्हणाले. अन्‍य मान्‍यवरांनीही विचार व्यक्त केले. आयआरसीटीसीचे अधिकारी राजीव जैन यानी यात्रेसंदर्भात माहिती दिली. या दौऱ्यासाठी खास चार्टर ट्रेनची व्यवस्था केल्याचे ते म्हणाले.

राज्‍यातील प्रत्येक वडीलधाऱ्या माणसाला सरकारमार्फत देवदर्शनाची संधी दिली जाईल. त्यांचा आनंद द्विगुणित व्हावा यासाठीच ही यात्रा सुरू करण्यात आली आहे. यात कसलेही राजकीय हित नाही. पहिल्या टप्प्यात तिरुपती व नंतर 20 नोव्हेंबरपासून वालंकिणी, शिर्डी येथे यात्रा आयोजित केली जाईल.

- डॉ. प्रमोद सावंत, मुख्यमंत्री