पणजी: राष्‍ट्रीय स्‍वयंसेवक संघातर्फे रविवारी आझाद मैदानावर आयोजित विजयादशमी उत्‍सवाला पणजीचे आमदार बाबूश मोन्‍सेरात उपस्‍थित होते. दोन तास बसून त्‍यांनी कार्यक्रमाचे अवलोकन केले. निसर्ग जपा, असा संदेश यावेळी राष्ट्रीय स्वयंसेवक संघाचे कोकण प्रांत संघचालक अर्जुन (बाबा) यशवंत चांदेकर यांनी दिला.

‘विजयादशमी कार्यक्रमातून आपल्‍याला भरपूर काही शिकायला मिळाले. संघाकडून कायमच समाजहिताचे काम सुरू असून, बालपणापासून आपण ते पाहत आलो आहे’, असेही त्‍यांनी नमूद केले. गत विधानसभा निवडणूक पणजीतून भाजपच्‍या उमेदवारीवर लढून ती जिंकलेले आणि मंत्रिपद मिळवलेले बाबूश मोन्‍सेरात भाजपच्‍या पणजीतील बहुतांशी कार्यक्रमांना न चुकता उपस्‍थित राहतात.

रविवारीही ते संघाच्‍या कार्यक्रमाला आवर्जून उपस्‍थित राहिले. पत्रकारांशी संवाद साधताना त्‍यांनी, आमंत्रणाबद्दल संघाच्‍या पणजी शाखेचे आभार मानले. संघाला शंभर वर्षे पूर्ण झाल्याबद्दल मी अभिनंदन करतो.

माझ्यावर रा. स्व. संघाचे संस्कार

राजकीयदृष्‍ट्या बाबूश यांचे विरोधक असलेले माजी मुख्‍यमंत्री स्‍व. मनोहर पर्रीकर यांचे पुत्र उत्पल पर्रीकर यांनीही आज संघाच्‍या गणवेशात कार्यक्रमाला उपस्‍थिती लावली होती. लहानपणापासूनच माझ्यावर संघाचे संस्कार झाले असून, त्‍याचा मला गर्व आहे. समाजातील प्रत्येक व्यक्तीने संघात यावे आणि संघ विचार आत्मसात करावेत, असे आवाहनही उत्‍पल पर्रीकर यांनी यावेळी केले.