डिचोली: बेशिस्तपणे ओव्हरटेक करण्याच्या कारणावरून झालेल्या वादातून एका दुचाकीस्वाराला अन्य एका दुचाकीस्वाराकडून बेदम मारहाण करण्यात आल्याचा प्रकार समोर आला आहे. ही घटना अस्नोडा बसस्थानकाजवळ घडली असून, मारहाणीचे दृश्य सीसीटीव्ही कॅमेऱ्यातही कैद झाले आहे. याप्रकरणी रत्नाकर देविदास यांनी बुधवारी कोलवाळ पोलिसांत तक्रार दाखल केल्यानंतर मारहाण करणाऱ्या संशयित सागर उसपकर याला पोलिसांनी गुरुवारी ताब्यात घेतले आहे.

मारहाणीची ही घटना गेल्या सोमवारी (ता. २७) अस्नोडा बसस्थानकाजवळ घडली होती. मात्र वैद्यकीय उपचारासाठी दोन दिवस गेल्यामुळे बुधवारी तक्रार दाखल करण्यात आल्याचे समजते. तक्रारदार रत्नाकर देविदास यांनी सीसीटीव्ही फुटेजही पोलिसांना सादर केले आहे.

रत्नाकर देविदास हा आपल्या मोटारसायकलवरून अस्नोड्याहून शिरगाव येथे मामाच्या घरी जात होता. अस्नोडा बसस्थानकाजवळ पोहोचताच मागाहून मोटारसायकलवरून येणाऱ्या सागर उसपकर याने रत्नाकरच्या दुचाकीला ओव्हरटेक केले. यावेळी अपघात (Accident) होता होता टळला. यावरून रत्नाकर याने सागरला जाब विचारला. त्यानंतर दोघांमध्ये वाद होऊन सागरने रत्नाकरवर हल्ला केला. यात रत्नाकरच्या तोंडाला आणि डोक्याला मुका मार बसला. त्याला तातडीने डिचोलीच्या सामाजिक आरोग्य केंद्रात आणि नंतर गोमेकॉत नेण्यात आले.