Goa Road Accident: पेडणे तालुक्‍यातील कासारवर्णे येथे बुधवारी सकाळी आठच्या सुमारास दोन दुचाकींमध्ये झालेल्या अपघातात सुजाता सुरेश सातार्डेकर (25 रा. कळणे-दोडामार्ग) या युवतीचा जागीच मृत्यू झाला.

तर, दुसऱ्या दुचाकीवरील फायझर फ्रान्सिस मास्कारेन्हस (25 रा. हसापूर) हा महाविद्यालयीन युवक गंभीर जखमी झाला.

उपचारांसाठी त्याला म्हापसा येथील जिल्हा रुग्णालयात दाखल केले. नंतर त्याला गोमेकॉत हलविण्यात आले.

मिळालेल्‍या माहितीनुसार, सुजाता सातार्डेकर ही युवती मोपा विमानतळावर नोकरीला होती. रात्रपाळी संपल्यावर सकाळी ती आपल्या दुचाकीने (एमएच-०७-एटी-११५०) कळणे-दोडामार्ग येथे घरी जात होती. त्याचवेळी काळाने तिच्यावर झडप घातली.

मोपाचे पोलिस निरीक्षक नारायण चिमुलकर यांच्या मार्गदर्शनाखाली उपनिरीक्षक दीपक हळदणकर आणि साहाय्यक उपनिरीक्षक मधुकर मळीक यांनी पंचनामा केला. पुढील तपास सुरू आहे.

हेल्‍मेटचे झाले तुकडे:-

सुजाता कासारवर्णे येथे पोहोचल्यावर दुचाकीपुढे असलेल्या एका कारला ओव्हरटेक करण्‍याचा तिचा अंदाज चुकला आणि समोरून भरधाव येणाऱ्या दुचाकीला तिची जोरात धडक बसली.

हा अपघात एवढा भीषण होता की, सुजाताच्‍या हेल्मेटचे तुकडे-तुकडे झाले. परिणामी तिच्‍या डोक्याला गंभीर दुखापत होऊन ती रक्ताच्या थारोळ्यात पडून जागीच मृत्युमुखी पडली.