पणजी: राज्यातील नद्यांच्या पाण्याच्या गुणवत्तेच्या ऑगस्ट २०२६ मधील तपासणीत अनेक ठिकाणी फिकल कोलिफॉर्मचे प्रमाण निर्धारित मर्यादेपेक्षा अधिक आढळले आहे. केंद्रीय प्रदूषण नियंत्रण मंडळाच्या अहवालात ही माहिती दिली आहे.

मंडळाच्या वर्गीकरणानुसार तपासलेल्या नदीस्थळांपैकी शापोरा नदीवरील शिवोली पूल, तेरेखोल नदीवरील केरी, मांडवी नदीवरील टोंक-माशेल, साळ नदीवरील खारेबांद व मोबोर तसेच झुआरी नदीवरील मडगाव जेटी व बोरी पूल येथे फिकल कोलिफॉर्म निर्धारित मर्यादेपेक्षा जास्त आढळले.

शापोरा नदीवरील शिवोली पुलाजवळ फिकल कोलिफॉर्मचे प्रमाण ७८० एमपीएन/१०० मिली असून, निर्धारित मर्यादा १०० आहे. तेरेखोल नदीवरील केरी येथे हे प्रमाण ९३० आहे. मांडवीच्या टोंक- माशेल येथे ७८०, सिकेरी, कांदोळीत अनुक्रमे ९२० व ७८० अशी नोंद आहे. झुआरी नदीच्या मडगाव जेटी येथे फिकल कोलिफॉर्म ६८०, तर बोरी पुलाजवळ ४५० आढळले.

साळ नदीवरील खारेबांद येथे ७८० आणि मोबोर येथे ४५० अशी नोंद झाली. मात्र, शापोरा नदीवरील हळर्ण किल्ला, डिचोली, अस्नोडा, वाळवंटी, खांडेपार, तळपण आणि कळणे नदीवरील चांदेल आदी ठिकाणी तपासलेले मापदंड निर्धारित मर्यादेत असल्याचे अहवालात नमूद आहे.