गोव्यात आज दिवसभरात 159 नव्या कोरोना (Goa Corona Cases) बाधित रूग्णांची नोंद झाली असून, 200 कोरोनामुक्तांना डिस्चार्ज देण्यात आलाय. गोव्यातील सक्रिय कोरोना रूग्णांची संख्या एक हजारांच्या पुढे गेली असून, सध्या राज्यात 1040 सक्रिय कोरोना रूग्णांवर (Active Corona Cases In Goa) उपचार सुरू आहेत. दिलासादायक बाब म्हणजे मागील पाच दिवसांत गोव्यात एकाही कोरोना रूग्णाचा मृत्यू झालेला नाही.

आरोग्य विभागाने प्रसिद्ध केलेल्या आकडेवारीनुसार, गोव्यात आजवर 2 लाख 55 हजार 408 जणांना कोरोनाची बाधा झाली आहे. त्यापैकी 2 लाख 50 हजार 411 जणांना डिस्चार्ज देण्यात आला आहे. राज्याचा रिकव्हरी रेट 98.04 टक्के एवढा आहे. राज्यात कोरोनामुळे 3,957 रूग्ण दगावले आहेत. दरम्यान, आज दिवसभरात 1,297 प्रयोगशाळा नमुने तपासले आहेत.

देशातील सक्रिय रूग्णांची संख्या एक लाखाच्या आत

देशात देखील कोरोना रूग्णांची संख्या पुन्हा वाढताना दिसत आहे. गेल्या 24 तासांत देशभरात 10,649 नव्या कोरोना बाधित रूग्णांची नोंद झाली असून, 36 रूग्णांचा मृत्यू झाला आहे. सध्याच्या घडीला देशात 96 हजार 442 रूग्ण उपचाराधीन आहेत. देशात सध्या महाराष्ट्र, केरळ, कर्नाटक, दिल्ली, पंजाब या राज्यात सर्वाधिक सक्रिय कोरोना रूग्ण आहेत.