Goa Rajyasabha Election: गोव्यातील राज्यसभेच्या एकमेव जागेसाठी 24 जुलै रोजी मतदान होणार आहे, हे यापुर्वीच जाहीर झाले आहे. आता या निवडणुकीचा कार्यक्रमही जाहीर झाला आहे.

गोवा विधानसभेच्या सचिव, निवडणुकीच्या रिटर्निंग ऑफिसर नम्रता उलमान यांनी आज या निवडणुकीची अधिसूचना जारी केली. त्यानुसार 24 जुलै रोजी व्हीआयपी ब्लॉक, गोवा विधानसभा संकुल, पर्वरी येथे सकाळी 9 ते दुपारी 4 या वेळेत मतदान पार पडेल.

उमेदवारी दाखल करण्याची अंतिम मुदत 13 जुलै आहे, 14 जुलै रोजी अर्जांची छाननी होईल आणि 17 जुलै ही माघारीची अंतिम तारीख आहे. 24 जुलै रोजी मतदान पार पडेल. राज्यसभेच्या निवडणुकीत आमदार मतदान करत असतात.

गोव्यातून राज्यसभेत एक खासदार निवडून जातो. भाजप नेते विनय तेंडुलकर हे गोव्यातून राज्यसभेवर निवडून गेलेले खासदार आहेत. त्यांचा राज्यसभेचा 6 वर्षांचा कार्यकाळ संपत आला आहे.

31 जुलै 2017 रोजी ते राज्यसभेवर निवडून गेले होते. तेंडुलकर यांची खासदारकीची मुदत येत्या 28 जुलै रोजी संपत आहे.

दरम्यान, सध्या या जागेसाठी भाजपकडून प्रदेशाध्यक्ष सदानंद शेट तानावडे यांच्या नावावर शिक्कामोर्तब होईल, अशी चर्चा आहे. तर विरोधी पक्षांकडून मात्र अद्याप कुणाचेही नाव समोर आलेले नाही. विधानसभेतील संख्याबळ पाहता, ही जागा भाजप पुन्हा सहज जिंकले, अशी परिस्थिती आहे.