Rajesh Phaldesai बायंगिणी येथील कचरा प्रक्रिया प्रकल्पाच्या ठिकाणी मोठ्या प्रमाणात वस्ती उभी राहिली आहे. या परिसरात सुमारे सात ते आठ हजाराहून लोक राहत असल्याने हा प्रकल्प तेथील नागरिकांच्या आरोग्याला धोकादायक ठरू शकतो.

या प्रकल्पामुळे तेथील रहिवाशांमध्ये भीतीचे वातावरण पसरले आहे. त्यामुळे बायंगिणी येथे हा प्रकल्पाला ठाम विरोध असेल तसेच तो या ठिकाणी कोणत्याच परिस्थितीत येऊ दिला जाणार नाही, असे ठाम मत कुंभारजुवेचे आमदार राजेश फळदेसाई यांनी व्यक्त केले.

बायंगिणी येथे मोठ्या प्रमाणात बांधकामे येत आहेत. तसेच अनेक लोक या ठिकाणी सदनिका खरेदी करत आहेत.

काहींनी स्वतःची घरे बांधली आहेत, अशा परिस्थितीत हा कचरा प्रकल्प या ठिकाणी सुरू झाल्यास मोठ्या प्रमाणात दुर्गंधी तसेच लोकांना तेथे राहणेही मुश्कील होणार आहे.

बायंगिणी येथील कचरा प्रकल्पाच्या कामावेळी तेथील स्थानिकांनी वेळोवेळी विरोध केला आहे. त्यामुळे त्या विरोधाला माझा पाठिंबा असेल. या बायंगिणी येथील परिसराचा विकास होत आहे. मोठमोठी बांधकामे उभी राहत आहेत.

त्यामुळे तेथे वास्तव्य करत असलेल्या तसेच पुढील काळात येथे उभे राहणाऱ्या वस्तीतील लोकांना आरोग्याच्या समस्येला सामोरे जाऊ लागू नये म्हणून आतापासूनच त्याला विरोध करण्यात येणार आहे.

सरकारने तो लादण्याचा प्रयत्न केल्यास या परिसरात नागरिक रस्त्यावर उतरतील व त्यांच्याबरोबर आपण राहू असे त्यांनी सांगितले.

दरम्यान, यापूर्वीच पणजीचे आमदार व मंत्री बाबुश मोन्सेरात यांनी बायंगिणीचा कचरा प्रकल्प ठरल्यानुसार होणार आहे. त्यासाठीची भूसंपादन प्रक्रिया पूर्ण झाली आहे. या प्रकल्पामुळे जी कचरा समस्या तिसवाडी तालुक्यामध्ये भेडसावत आहे ती बऱ्याच प्रमाणात कमी होणार आहे. त्यामुळे हा प्रकल्प होणे आवश्‍यक आहे.

कचरा कोठे टाकायचा?

मोन्सेरात म्हणाले, बायंगिणी येथे कचरा प्रक्रिया प्रकल्पासाठीची जागा तेथे वस्ती उभी राहण्यापूर्वी निवडण्यात आली होती. त्यामुळे ज्या विकासकांनी या ठिकाणी जागे घेऊन इमारती बांधून त्यातील सदनिका विकल्या असल्या तरी त्यांना या प्रकल्पाबाबतची पूर्वकल्पना होती.

त्यामुळे लोकांनीही सदनिका खरेदी करण्यापूर्वी त्याचा विचार करण्याची गरज होती. कचरा प्रकल्पासाठी निवड झालेल्या जागांना विरोध होत राहिला तर हा कचरा कोठे टाकायचा.