सांगे : गेले चार दिवस सांगे भागात पडत असलेल्या धुव्वाधार पावसामुळे कुयणामळ सांगे येथील शिरोडकर यांच्या घरात पावसाचे पाणी झिरपून वाहू लागल्याने कुटुंबीयांना नातलगांच्या घरी जावे लागले असून पावसाच्या पाण्यामुळे घरातील सामानाची हानी झाली आहे.

शिरोडकर यांचे घर हे साठ वर्षे जुने असून संपूर्ण घर मातीचे असल्यामुळे भीती खालून पाण्याचे झरे घरातून वाहू लागल्याने घरात सर्वत्र गुडघाभर पाणी वाहू लागलें आहे. सकाळी सांगेचे मामलेदार राजेश साखळकर यांनी या घटनेची पाहणी केली आहे. शिरोडकर कुटुंबीयांनी यावर उपाय काढून आम्हाला सुरक्षा द्यावी,अशी मागणी केली आहे. शिरोडकर कुटुंबीय रहात असलेल्या घराच्या मागील बाजूस खडकाळ व उंचवटा असलेला भाग असल्याने पावसाचे पाणी घराच्या बाजूने वाहून येत आहे.

पाण्याचे झरे घराखालून वाट वाहू लागल्याने मातीच्या घराला धोका निर्माण झाला आहे. या घरात पाच कुटुंबे राहतात. पण पाचही घरातून नैसर्गिक झऱ्याप्रमाणे पाणी वाहून जात आहे. चौदा वर्षांपूर्वी असाच पाण्याचा प्रवाह घरातून वाहत होता त्यावेळी उपाय योजना केली असती तर अशी घटना घडली नसती, अशी प्रतिक्रिया दीपक शिरोडकर यांनी व्यक्त केली. शिवयोद्धा संघटनेचे अध्यक्ष विनेश प्रभुदेसाई यांनी घटनास्थळी पाहणी करून घराला धोका संभवित असून सरकारने तातडीने सुरक्षा उपाय योजावेत,अशी मागणी केली.