Quepem Sewage Inspection

केपे: येथील पालिका बाजारासमोर असलेल्या तीन रहिवासी इमारतीतील सांडपाण्याचा निचरा होण्यासाठी कोणतीच व्यवस्था न केल्याने गेल्या कित्येक वर्षांपासून सांडपाणी उघड्या जागेत वाहत आहे. श्रीपाद शेटकर यांनी याबाबत प्रदूषण नियंत्रण मंडळ व इतर संबंधित खात्यांना निवेदन सादर लक्ष वेधल्यानंतर सोमवारी प्रदूषण नियंत्रण मंडळ, केपे प्राथमिक आरोग्य केंद्र व केपे पालिकेतर्फे संयुक्त पाहणी करण्यात आली.

यावेळी इमारतींतील सांडपाण्याचा निचरा योग्य प्रकारे होत नसल्याचे दिसून आले, असे केपे प्राथमिक आरोग्य केंद्राचे डॉ. बाब्तीस्ता यांनी सांगितले. यावेळी प्रदूषण नियंत्रण मंडळाचे साईश वळडणकर, केपे पालिकेचे अभियंता नितीन कोठारकर, प्राथमिक आरोग्य केंद्राचे डॉ. बाब्तीस्ता व श्रीपाद शेटकर उपस्थित होते.

परिसरात घाणीचे साम्राज्य : शेटकर

कुसमण भागात असलेल्या या रहिवासी इमारती शेत जमिनीत बांधल्या असून मात्र या इमारतींत सांडपाण्याचा निचरा व्यवस्था नसल्याने सांडपाणी रस्त्यावरून वाहत आहे. त्यामुळे या परिसरात घाणीचे साम्राज्य पसरले आहे. हा विषय वेळोवेळी उपस्थित करूनही संबंधित खाते तसेच केपे पालिकेने कधी लक्ष न दिल्याने आपण प्रदूषण नियंत्रण मंडळाला पत्र पाठवून या इमारतींच्या सोकपिटची पाहणी करण्याची मागणी केली होती. त्यानुसार संयुक्त पाहणी केली असल्याचे श्रीपाद शेटकर यांनी सांगितले.