पणजी: १ मार्च ते ३१ मे या तीन महिन्यांत राज्यात तब्बल २६.२८ इंच इतक्या विक्रमी पावसाची नोंद झाली. वास्‍तविक या कालावधीत सर्वसाधारणपणे दोन ते तीन इंच पावसाची अपेक्षा असते. परंतु यंदा त्‍यात तब्बल ८५६.९ टक्‍क्‍यांनी वाढ झाली आहे.
वरील तीन महिन्यांत सर्वाधिक ३२.६७ इंच पावसाची नोंद मडगावात तर सर्वांत कमी पाऊस वाळपई येथे १७.९५ इंच इतका पडला. खरेतर २६ मार्च हा एक दिवस ७.५ मिमी पाऊस वगळता उर्वरित पाऊस हा १३ ते ३१ मेदरम्यान पडला आहे. म्हणजेच मागील अठरा दिवसांत इतक्या मोठ्या प्रमाणात पावसाची नोंद झाली आहे. मागील वीस वर्षांत तरी या कालावधीत एवढ्या मोठ्या प्रमाणात मान्सूनपूर्व पाऊस पडला नसल्याचे अनेक हवामान अभ्यासकांचे मत आहे.
मागील तीन महिन्यांत एकाच दिवशी सर्वाधिक १३९.५ मिमी म्हणजेच ५.४९ इंच पावसाची नोंद २१ मे रोजी करण्यात आली. सर्वसामान्यपणे ५ इंचांहून अधिक पाऊस पडत असेल तर अतिवृष्टी समजली जाते. अशा स्थितीत मान्सूनपूर्व कालावधीत इतका पाऊस पडणे हा एक विक्रमच आहे.
गेल्या २४ तासांत राज्यात सांगेत ६.५ मिमी, मडगाव ४ मिमी, पेडणे ३.४ मिमी तर जुने गोवे आणि काणकोण येथे तुरळक पावसाची नोंद करण्यात आली. पुढील दोन दिवस मध्यम स्वरूपाच्या पावसाची शक्यता वर्तविण्यात आली असून दोन दिवस ‘यलो अलर्ट’ जारी करण्यात आला आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.