पणजी: वीज खात्यामध्ये (Goa Goa power department) सहाय्यक अभियंता (engineer) असलेल्या आंतोनिओ कार्व्हाल्हो (वय 53) यांनी आज दुपारी 12.30 च्या सुमारास ते राहत असलेल्या मिरामार (Miramar) येथील इमारतीच्या सहाव्या मजल्यावरून उडी घेऊन आत्महत्या केली. या घटनेप्रकरणी पणजी पोलिसांनी (Panaji Police) अनैसर्गिक मृत्यूची नोंद केली असल्याची माहिती पोलिस निरीक्षक सुदेश नाईक यांनी दिली.

विवाहित असलेले आंतोनिओ कार्व्हाल्हो हे मिरामार येथील शालोम या इमारतीच्या चौथ्या मजल्यावरील फ्लॅटमध्ये एकटेच राहत होते. कौटुंबिक समस्येमुळे त्यांची पत्नी व मुले वेगळी रहात होती. गेल्या काही दिवसांपासून ते तणावाखाली होते.

पणजी वीज कार्यालयात ते आज कामावर गेले नव्हते. त्यांनी रहात फ्लॅटचे दार बंद करून ते सहाव्या मजल्यावर गेले व तेथून त्यांनी खाली उडी घेतली. या घटनेमुळे इमारतीखाली मोठा आवाज झाल्याने इमारतीमधील इतर फ्लॅटमधील लोकांनी खाली पाहिले असता कार्व्हल्हो हे रक्ताच्या थारोळ्यात पडले होते. त्यांच्या डोक्याला जबर मार लागल्याने त्यांचा मृत्यू झाला होता.

या घटनेची माहिती शेजाऱ्यांनी पणजी पोलिसांना दिली. पंचनामा करून त्यांचा मृतदेह वैद्यकीय तपासणीसाठी गोमेकॉ इस्पितळात पाठवण्यात आला. या घटनेसंदर्भातची माहिती त्यांच्या कुटुंबियांना देण्यात आल्याची माहिती पोलिसांनी दिली. या घटनेने परिसरात हळहळ व्यक्त केली जात आहे.