Goa Power Consumption: घरगुती वीज वापरात गोवा देशात अव्वल राज्य ठरले आङे. गोव्यात एका महिन्यात सरासरी 263 kWh वीज वापरली जाते. हे प्रमाण आसाममधील सरासरी घरगुती वापराच्या पाचपट जास्त आहे. आसाममध्ये सर्वात कमी वीजवापर आहे.

ऊर्जा क्षेत्रातील सार्वजनिक हितसंबंधित संशोधन करणाऱ्या पुण्यातील प्रयास या संस्थेने केलेल्या विश्लेषणातून ही बाब समोर आली आहे. दरम्यान, 2012-2022 या काळात भारताचा एकूण देशांतर्गत ऊर्जेचा वापर 171 अब्ज युनिट्सवरून 340 अब्ज युनिटपर्यंत वाढला आहे.

या अभ्यासात म्हटले आहे की, औद्योगिक आणि घरगुती क्षेत्रे देशातील वीज वापरातील वाढीचे मुख्य चालक आहेत. दरम्यान, वीजेच्या अतिरिक्त मागणीमध्ये उत्तर प्रदेश, तामिळनाडू, बिहार, मध्य प्रदेश आणि महाराष्ट्राचा वाटा जवळपास ५० टक्के होता.

बिहारमध्ये विजेच्या वापरात नाट्यमयरित्या वाढ झाली आहे. तिथे 2022 मध्ये कुटुंबाचा सरासरी वीजवापर 2012 पेक्षा सहापट जास्त झाला आहे.

मध्य प्रदेश आणि ओडिशामध्येही घरगुती वीजवापर दुप्पट झाला आहे, तर जम्मू आणि काश्मीर आणि लडाख केंद्रशासित प्रदेशांमध्ये 2012 ते 2022 दरम्यान 200 टक्के वाढ झाली आहे.

2012 ते 2022 या काळात देशांतर्गत वीज वापराने वार्षिक 7.1 टक्के वाढीचा सर्वोच्च दर नोंदवला आहे. तर 2012-22 या दशकात उद्योगांकडून सर्वाधिक अतिरिक्त वीज मागणी झाली आहे.

2012-2022 या कालावधीत औद्योगिक क्षेत्राचा अतिरिक्त वीज मागणीतील वाटा 39 टक्के होता. घरगुती वापरकर्त्यांचा वाटा 32 टक्के होता आणि कृषी वापराचा वाटा 2012-2022 दरम्यान अतिरिक्त मागणीच्या 16 टक्के होता.

औद्योगिक वीज वापरात अनुक्रमे गुजरात, ओडिशा, महाराष्ट्र, तामिळनाडू आणि छत्तीसगड ही टॉप राज्ये आहेत.