पणजी: सोमवारी दुपारनंतर राज्यभर मान्सूनोत्तर पावसाने हजेरी लावली, त्यामुळे ‘ऑक्टोबर हिट’मुळे हैराण झालेल्या नागरिकांना दिलासा मिळाला. मात्र, दसरोत्सवाच्या पार्श्वभूमीवर बाजारात विक्रेत्यांची आणि नागरिकांची पळापळ झाली. तसेच वादळी वाऱ्यासह पडलेल्या या पावसामुळे काही ठिकाणी पडझड झाली. अवकाळी पावसाचा फटका काढणीवर आलेल्या भातपिकावर होण्याची शक्यता निर्माण झाली आहे.

राजधानी पणजी परिसरात मध्यम स्वरूपाच्या सरी कोसळल्या. पणजी परिसरात दुपारनंतर ढगाळ वातावरण निर्माण झाले, त्यामुळे पावसाचा अंदाज बांधला जात होता. मंगळवारी दसऱ्यामुळे झेंडूची फुले विक्रीसाठी रस्त्याच्या बाजूला बसलेल्या विक्रेत्यांची पावसामुळे (Rain) धावपळ झाली. मोठ्या प्रमाणात पाऊस पडला असता, तर फुलांच्या विक्रीवर परिणाम झाला असता; पण काही वेळाने पाऊस थांबल्यानंतर फूल खरेदीदार दिसू लागले.

हवामान खात्याने आणखी दोन दिवस कुशावती जिल्ह्यासह उत्तर गोव्यातील काही भागांत पाऊस हजेरी लावेल, असा अंदाज वर्तविला आहे. पेडणे तालुक्यात संध्याकाळी चारच्या सुमारास अचानक गडगडाटासह जोरदार पावसाने हजेरी लावली. सुमारे दीड तास कोसळलेल्या या पावसामुळे नागरिकांची धांदल उडाली.

भात शेतीला फटका

सावईवेरे, वळवई व केरी पंचक्रोशीत दुपारी पावसाने हजेरी लावली. दुपारी अडीचच्या सुमारास गडगडाटासह सुरू झालेला वादळी पाऊस सुमारे एका तासाहून अधिक काळ सुरू होता. काही ठिकाणी भात शेतीला फटका बसला.