Porvorim Crime: पर्वरीत सार्वजनिक ठिकाणी अयोध्येत होणाऱ्या रामलल्ला प्राण प्रतिष्ठापना सोहळ्याची माहिती देणारे पोस्टर अज्ञात व्यक्तीने फाडल्याची घटना घडली होती. पोस्टर फाडल्याने या परिसरात तणावाचे वातावरण निर्माण झाले होते.

मात्र पोस्टर फाडणारा व्यक्ती सीसीटीव्हीमध्ये कैद झाल्याने पोलिसांनी तपास वेगाने सुरु केला होता. पोलिसांच्या तपास कामाला यश आले असून अवघ्या काही तासात पोस्टर फाडणाऱ्याला पोलिसांनी ताब्यात घेतलंय. सादीक असे या पोस्टर फाडणाऱ्याचे नाव असून 29 वर्षांचा आहे.

सादीक हा सध्या कळंगुट येथे राहत असून तो मूळ बदापूर, तेडीबाजार मोहल्ला, उत्तर प्रदेश येथील असल्याचे समजतेय.

पर्वरी पोलीसांकडून मिळालेलय माहितीनुसार अयोध्येतील राम मंदिरातील स्थापनेच्या कार्यक्रमाचे मोठे बॅनर पर्वरी परिसरात लावण्यात आले होते. मात्र अज्ञात व्यक्तीने त्यातील एक बॅनर फाडल्याने शुक्रवारी सकाळपासूनच परिसरात तणाव निर्माण झाला होता.

घटनेची माहिती मिळताच पोलिसांनी अनेक शोध पथके तयार करत परिसरातील सुमारे 30 सीसीटीव्ही कॅमेऱ्यांची तपासणी केली. या तपासणीत पोलिसांना बॅनर फाडणारा व्यक्ती स्पष्टपणे आढळून आला. याच माहितीच्या आधारावर पोलिसांनी संशयिताला ताब्यात घेत घटनेचं छडा लावला.

या कामगिरीमध्ये पोलीस पथकातील पीएसआय वामन नाईक, पीएसआय मंदार परब, पीएसआय सर्वेश जी. भंडारी, एएसआय उमेश पावस्कर, महादेव नाईक, तुषार राऊत, सिद्धेश नाईक, नितेश गावडे, उत्कर्ष देसाई आणि वैभव कांबळी या कर्मचाऱ्यांनी सहभाग घेतला होता.