सांताक्रुझ येथील पोर्तुगीजकालीन बंद घराला आग लागून लाखो रुपयांचे नुकसान झाले. ही घटना 3 मार्च संध्याकाळी 5 च्या दरम्यान घडली. दोन तास आगीशी झुंज दिल्यानंतर अग्निशमन दलाच्या जवानांनी ती आटोक्यात आणली.

या आगीत घरातील पोर्तुगीजकालीन जुने लाकडी सामान व वस्तू तसेच घराच्या छप्पराचे सामान खाक झाले. ही आग विझवण्यासाठी तीन पाण्याचे बंब वापरण्यात आल्याची माहिती पणजीचे अग्निशमन स्थानकाचे अधिकारी दिलीप गावस यांनी दिली.

हे घर मिनेझिस वाझ यांचे असून ते बंद होते. घरातून धूर येऊ लागल्याने शेजारी असलेल्या घरातील लोकांनी तसेच स्थानिक आमदार रुडॉल्फ फर्नांडिस यांनी याची माहिती अग्निशमन नियंत्रण कक्षाला दिली. लोकांनी या घराचे बंद असलेले टाळे तोडून हीआग विझविण्याचा प्रयत्न केला.

साहित्य खाक

पोर्तुगीजकालीन घर असल्याने ते लाकडी सामानाचे होते. घराचे छप्पर हे लाकडी सामानावर होते तसेच घरात किंमती जुने लाकडी सामान होते. घरातील सर्व खोल्यांमधील सामान आगीत खाक झाले आहे. या आगीमागील कारण स्पष्ट झालेले नाही.

वीज खात्याशी यासंदर्भात संपर्क साधण्यात आला आहे. या आगीत किती नुकसान झाले याचा अंदाज व्यक्त करता येत नाही. लाखो रुपयांचे नुकसान झाले असण्याची शक्यता नाकारता येत नाही, असे गावस यांनी सांगितले.