Goa Crime: गोवा, महाराष्ट्र, कर्नाटकसह इतर राज्यांत पर्यटक बनून धाडसी चोऱ्या करणारा संतोष कुमार (42, रा. ओडिशा) याला पोलिसांनी जेरबंद केले आहे. फोंडा, पणजी, पर्वरीसह इतर चोऱ्यांप्रकरणी तो वॉन्टेड होता. त्याला पणजी पोलिसांनी रविवारी जेरबंद करून आज फोंडा पोलिसांच्या ताब्यात दिले.

ऑगस्ट महिन्यात खांडोळा येथील महागणपती मंदिरात चोरी करून दहा ते बारा लाखांचा ऐवज लंपास झाला होता. या प्रकरणी संतोष कुमारने चोरीची कबुली दिली आहे. दरम्यान, गोव्यात तसेच इतर राज्यात चोरीच्या उद्देशाने गेल्यानंतर त्याचे वास्तव्य एखाद्या स्वस्त हॉटेलात असायचे. दहा वर्षांपूर्वीही त्याने म्हापसा येथे एका मंदिरात चोरी केली होती.

मंदिरांची टेहळणी

चोरीपूर्वी संतोष कुमार मंदिराची टेहाळणी करायचा. भाड्याच्या टॅक्सीने चांगले कपडे घालून तो येत असल्याने कुणालाही तो पर्यटक असावा असे वाटायचे. मात्र, रात्र झाल्यावर तो चोरी करून मोकळा व्हायचा व ज्या टॅक्सीवाल्याने त्याला आणून सोडले होते, त्यालाच तो न्यायला पहाटे बोलवायचा आणि हॉटेलवर चोरीच्या मुद्देमालासह जायचा. त्यामुळे कुणालाच त्याचा संशय येत नव्हता.