पणजी: गोव्याच्या राजकीय वर्तुळातून एक अत्यंत धक्कादायक आणि मोठी बातमी समोर आली आहे. राज्यातील तरुण आणि आक्रमक पक्ष म्हणून ओळखल्या जाणाऱ्या 'रिव्होल्युशनरी गोवन्स पार्टी'चे (RGP) अध्यक्ष आणि संस्थापक सदस्य मनोज परब यांनी 'आरजीपी'चा राजीमाना देण्याची घोषणा केली आहे. त्यांनी केवळ आरजीपीच्या अध्यक्षपदाचाच राजीनामा दिला नसून, पक्षाचे संस्थापक सदस्य म्हणूनही ते बाहेर पडणार असल्याचे जाहीर केले आहे. मनोज परब यांच्या या तडकाफडकी निर्णयामुळे गोव्याच्या राजकीय क्षेत्रात एकच खळबळ उडाली आहे.

पणजीतील पत्रकार परिषदेत मोठी घोषणा

मनोज परब यांनी पणजी येथील आरजीपीच्या मुख्य पक्ष कार्यालयात एक पत्रकार परिषद घेतली. या पत्रकार परिषदेत त्यांनी आपण राजकारणाला रामराम ठोकणार असल्याचा निर्णय जाहीर केला. त्यांनी घेतलेल्या या अनपेक्षित निर्णयामुळे पक्षाचे पदाधिकारी, कार्यकर्ते आणि त्यांचे पाठीराखे यांना मोठा धक्का बसला आहे.

राजीनाम्यामागचे गूढ अद्याप कायम

मनोज परब यांनी आरजीपीचा राजीनामा का दिला? यामागील नेमके आणि ठोस कारण अद्याप स्पष्ट होऊ शकलेले नाही. पत्रकार परिषदेत त्यांनी आपल्या भावना व्यक्त केल्या असल्या, तरी अंतर्गत मतभेद किंवा वैयक्तिक कारणांमुळे त्यांनी हे पाऊल उचलले का, याबाबत राजकीय वर्तुळात विविध तर्कवितर्क लावले जात आहेत. गोव्यातील स्थानिक लोकांच्या हक्कासाठी लढणारा नेता म्हणून त्यांची ओळख निर्माण झाली होती, त्यामुळे त्यांच्या अशा अचानक जाण्याने अनेक प्रश्न निर्माण झाले आहेत.

आरजीपीच्या भविष्यातील नेतृत्वावर प्रश्नचिन्ह

'रिव्होल्युशनरी गोवन्स पार्टी'च्या स्थापनेपासूनच मनोज परब हे पक्षाचा मुख्य चेहरा आणि कणा राहिले आहेत. त्यांच्या नेतृत्वाखाली पक्षाने गोव्यात आपली एक वेगळी मतपेढी तयार केली होती. आता त्यांनीच पक्षाला रामराम ठोकल्यामुळे आरजीपीच्या भविष्यातील वाटचालीवर आणि नेतृत्वावर मोठे प्रश्नचिन्ह उभे राहिले आहे.

मनोज परब यांच्यानंतर पक्षाची धुरा कोणाकडे सोपवली जाणार आणि आरजीपी आपले अस्तित्व टिकवून ठेवण्यात यशस्वी होणार का, याकडे आता संपूर्ण गोव्याचे लक्ष लागले आहे. विरोधकांनीही या घडामोडीवर बारीक लक्ष ठेवले असून, आगामी काळात गोव्याच्या राजकारणाला कोणती नवीन दिशा मिळते, हे पाहणे महत्त्वाचे ठरेल.