पणजी: रिव्हॉल्युशनरी गोवन्स पक्षाची धुरा आता कोणाकडे, या प्रश्नाचे उत्तर २४ तासानंतरही मिळू शकलेले नाही. निर्नायकी अवस्थेत सध्या हा पक्ष असून गेल्या १२ तासांत कोणीही जाहीर वक्तव्य न केल्याने गूढ वाढत चालले आहे.

पक्षाचे अध्यक्ष मनोज परब यांच्या अचानक राजीनाम्यानंतर तब्बल २४ तास उलटले, तरी पक्षाची पुढील सूत्रे कोणाच्या हाती जाणार याबाबत स्पष्टता नसल्याने राजकीय वर्तुळात विविध चर्चांना उधाण आले आहे. ‘पोगो’ आणि स्थानिक प्रश्नांवर आक्रमक भूमिका घेत अल्पावधीत स्वतःची वेगळी ओळख निर्माण करणाऱ्या पक्षात आता नेतृत्वाचा प्रश्न ऐरणीवर आला आहे.

बोरकर नेमके आहेत कुठे ?

आमदार वीरेश बोरकर यांची भूमिका सर्वाधिक चर्चेत आहे. पक्षाच्या भवितव्याबाबत बोलण्याची जबाबदारी नैसर्गिकरित्या त्यांच्यावर येते; मात्र ते अद्याप सार्वजनिकरीत्या मौन बाळगून आहेत.

ते नेमके कुठे आहेत? पक्षातील घडामोडींवर त्यांची भूमिका काय आहे आणि पुढील दिशा काय असणार, याबाबत कोणतीही ठोस माहिती समोर आलेली नाही.

काहींच्या मते, पक्षातील अंतर्गत मतभेद आता उघडपणे समोर येत असून नेतृत्वाच्या केंद्रीकरणाचा परिणाम दिसू लागला आहे. तर दुसरीकडे, काही कार्यकर्ते हा तात्पुरता धक्का असल्याचे सांगत पक्ष पुन्हा उभारी घेईल, असा दावा करत आहेत.