वास्को: कुठ्ठाळी काँग्रेस गट अध्यक्ष पीटर डिसोझा व काँग्रेस नेते ओलंसियो सिमोईस यांच्यामधील बैठकीतील वाद तसेच मारहाण प्रकरणाची चर्चा येथे रंगली आहे. मारहाण केल्याप्रकरणी पीटर डिसोझा यांनी वेर्णा पोलिस स्थानकात तक्रार केली आहे.

दरम्यान, हा वाद आमच्यातील व्यक्तीगत कारणास्तव असल्याचे स्पष्टीकरण पीटर डिसोझा यांनी दिले आहे. मात्र झुआरीनगरातील काँग्रेस कार्यालयात हा वाद व मारामारीचा प्रकार घडल्याने काँग्रेस विरुद्ध काँग्रेस अशा प्रतिक्रिया येथे ऐकण्यास मिळत आहेत.

नुकत्याच पार पडलेल्या जिल्हा पंचायत निवडणुकीचा आढावा घेण्यासाठी सिमोईस यांनी झुआरीनगर येथे कार्यालयात मंगळवारी (ता. ३०) बैठक बोलाविली होती. या बैठकीला काही नेते व कार्यकर्ते उपस्थित होते. या बैठकीचे पीटर यांना आमंत्रण दिले नव्हते. मात्र काहीजणांनी पीटर यांना माहिती दिल्यावर ते बैठकीच्या ठिकाणी आले.

आपण गटाध्यक्ष असतानाही आपणास का आमंत्रण नाही, तुम्हाला शिष्टाचार माहीत नाही काय अशी विचारणा त्यांनी केली. त्यानंतर वाद वाढत गेला. एकमेकांवर आरोप प्रत्यारोप सुरू झाले. काहीजणांनी मध्यस्थी करून वाद मिटविण्याचा प्रयत्न केला. मात्र पीटर यांनी एकामागून एक प्रश्न विचारण्यास आरंभ केल्यावर संतापलेल्या सिमोईस यांनी त्यांना ‘गेट आउट’ असे सुनावले.

त्यानंतर वाद वाढला. काहीजण त्यांना शांत करण्याचा प्रयत्न करीत असतानाच सिमोईस आपल्या जागेवरून उठले व त्यांनी पीटर यांना दोन तीन लाथा घालत ढकलले. पीटर यांना ढकल्याबद्दल तेथे उपस्थित असलेल्या काहींनी नाराजी व्यक्त केली. याप्रकरणी पीटर यांनी पोलिस स्थानकात तक्रार केल्याने एकंदर घटना चर्चेत आली.

सिमोईस यांनी यापूर्वी भाजपातर्फे जिल्हा पंचायत, आप व काँग्रेसतर्फे विधानसभा निवडणूक लढविली होती. पीटर हे माजी उपसभापती सायमन डिसोझा यांचे पुत्र आहेत. दोघांचा सामाजिक वावर आहे. स्थानिक प्रश्नांवर दोघेही आवाज उठवीत असतात. मात्र मंगळवारी घडलेल्या घटनेमुळे त्या दोघांबरोबर काँग्रेस पक्षही चर्चेत आला आहे.