Baga: गोवा पोलिसांच्या अँटी नार्कोटिक्स सेलने बागा येथे टाकलेल्या धाडीत उत्तर प्रदेशातील युवकास अमली पदार्थांसह अटक केली. सत्यप्रकाश जानोआ असे त्याचे नाव असून तो मूळचा आग्रा येथील आहे. त्याच्याकडे 5.10 लाख रूपयांचे हशिश सापडले आहे.

गेल्या काही दिवसात गोवा पोलिसांच्या अँटी नार्कोटिक्स सेलने अनेक ठिकाणाहून अमली पदार्थ जप्त केले आहेत. अमली पदार्थांच्या तस्करीत परप्रांतीय तरूण सक्रीय असल्याचे वारंवार समोर येत आहे.

गुरूवारीच आगशी येथे पोलिसांनी अमली पदार्थ तस्करीविरोधी कारवाईत राजस्थानच्या एका युवकास अटक केली होती. त्याच्याकडून एकूण 194.08 ग्रॅम अफू जप्त केला होता. याची बाजारपेठेतील किंमत तब्बल 1 लाख 10 हजार रूपये असल्याचे सांगितले जाते.

पोलिस निरीक्षक विक्रम नाईक यांच्या नेतृत्वाखालील पथकाने ही कारवाई केली. हेताराम हाजारीराम सारन असे अटक केलेल्या राजस्थानी युवकाचे नाव आहे. तो 26 वर्षांचा आहे.

काही दिवसांपुर्वीच आगशी पोलिसांनी तेलंगणातील एकाला गांजा बाळगल्याप्रकरणी अटक केली होती. कनका परमेश्वर राव असे आरोपीचे नाव होते. पोलिसांनी येथील रेस्टॉरंटवर छापा टाकला आणि आरोपीला ताब्यात घेतले होते.

तर हणजूण येथील कारवाईत पोलिसांनी दोघांना अटक केली होती. त्यांच्याकडून एक लाख दोन हजार रूपयांचे अंमली पदार्थ जप्त केले होते. यात 74 ग्रॅम चरस आणि 92 ग्रॅम गांजाचा समावेश आहे. हफजल हबीब (43) आणि प्रीतेश संगम (35) अशी अटक केलेल्यांची नावे आहेत. पैकी हबीब हा मूळचा केरळचा आहे. तर प्रीतेश हा हणजूण येथीलच रहिवाशी आहे.