पणजी: पोलिस महासंचालकांच्या निर्देशानुसार, पोलिसांनी ११ ऑक्टोबर रोजी राज्यभर नाकाबंदी मोहीम राबविली. तसेच कायदा व सुव्यवस्था राखण्यासाठी व्यापक तपासणी केली. या मोहिमेदरम्यान राज्यभरात ३,९७९ नागरिकांसह २,९७२ वाहनांची तपासणी केल्याची माहिती उत्तर गोवा पोलिस अधीक्षक राहुल गुप्ता यांनी दिली.

तपासणीदरम्यान पोलिसांनी ३५ जणांना प्रतिबंधात्मक अटक केली. त्याचप्रमाणे, ‘कोटपा’अंतर्गत (सिगारेट ॲण्ड अदर्स टोबॅको प्रॉडक्ट ऍक्ट) ८६ आणि सार्वजनिक ठिकाणी धूम्रपान व थुंकणे नियम उल्लंघनांबाबत ८८ कारवाया केल्या.

जिल्हानिहाय तपशीलानुसार, उत्तर गोव्यात व्यक्ती व वाहन तपासणीचे प्रमाण जास्त होते, तर दक्षिण गोव्यात धूम्रपान आणि थुंकणे यावर मोठ्या प्रमाणात कारवाई केली. सार्वजनिक सुरक्षा आणि कायद्याची अंमलबजावणी प्रभावीपणे करण्यासाठी अशा राज्यव्यापी नाकाबंदी मोहिमा नियमितपणे राबविण्यात येतील, असे गोवा पोलिसांनी स्पष्ट केले आहे.

दक्षिणेत आरोग्य नियमोल्लंघनावर बडगा

दक्षिण गोव्यातील १७ पोलिस ठाण्यांच्या हद्दीत ही मोहीम राबविली. एकूण १,४१९ नागरिक आणि ९८० वाहनांची तपासणी केली. तसेच १२ जणांना प्रतिबंधात्मक अटक केली.

या सर्व कारवाया कोलवा व मुरगाव पोलिस ठाण्यांच्या हद्दीत झाल्या. ‘कोटपा’अंतर्गत ३९ आणि धूम्रपान व थुंकणे प्रतिबंध नियमांअंतर्गत ५६ जणांवर कारवाई केली. दक्षिण गोव्यात सार्वजनिक आरोग्य आणि स्वच्छतेशी संबंधित उल्लंघनांवर पोलिसांनी विशेष लक्ष केंद्रित केल्याचे स्पष्ट होते.

उत्तरेत ग्रामीण भागात वचक

उत्तर गोव्यात १४ पोलिस ठाण्यांच्या हद्दीत ही मोहीम पार पडली. या भागात २,५६० नागरिक आणि १,९९२ वाहने तपासली. २३ जणांना प्रतिबंधात्मक अटक केली. ‘कोप्टा’अंतर्गत ४७, तर धूम्रपान व थुंकणे प्रतिबंध उल्लंघनांबाबत ३२ जणांवर कारवाई केली. जुने गोवे, हणजूण, कळंगुट आणि साळगाव पोलिस ठाण्यांच्या कार्यक्षेत्रात सर्वाधिक प्रतिबंधात्मक कारवाई केली.