Goa News: सेंट फ्रान्सिस झेवियर यांच्याबाबत वेलिंगकरांनी केलेल्या आक्षेपार्ह वक्तव्यावरुन राज्यात राळ उठली आहे. ख्रिस्ती समुदायाने वेलिंगकरांच्या तात्काळ अटकेची मागणी केली आहे. यातच, गोव्यातील आम आदमी पक्षाचे नेते अमित पालेकर यांनीही वेलिंगकरांच्या मुद्यावरुन गोवा पोलिसांवर निशाणा साधला.

पालेकरांचा निशाणा

गोवा पोलिसांची (Goa Police) एक खासियत आहे, ती म्हणजे पॉलिटिकल केस असेल तर ते तात्काळ कामाला लागतात. मात्र तसे नसेल तर ते कारणे देऊन वेळकाढूपणा करतात. वेलिंगकरांच्या बाबतीतही गोवा पोलिस मुद्दाम वेळकाढूपणा करतायेत. या सगळ्यात सरकारचाही तितकाच हात आहे. वेलिंगकराच्या स्टेटमेंटमध्ये सुद्धा सरकारचा हात असणार, असा निशाणा पालेकरांनी साधला.

वेलिंगकरांचा अटपूर्व जामीन फेटाळला!

आक्षेपार्ह वक्तव्याप्रकरणी सुभाष वेलिंगकरांना पणजी पणजी अतिरिक्त सत्र न्यायालयाने मोठा झटका दिला. न्यायालयाने वेलिंगकरांचा सशर्त अटकपूर्व जामीन फेटाळून लावला. वेलिंगकरांनी शनिवारी अटकपूर्व जामिनासाठी पणजी अतिरिक्त सत्र न्यायालयात अर्ज केला होता. मात्र, अतिरिक्त सत्र न्यायाधीश बॉस्को रॉबर्ट्स यांनी वेलिंगकरांचा अटकपूर्व जामीन फेटाळून लावला. एवढचं नाहीतर वेलिंगकरांना पोलिसांसमक्ष हजर राहण्याचे आदेश देखील न्यायालयाने (Court) दिले.

तियात्रिस्त समुदायाकडून वेलिंगकरांच्या अटकेची मागणी

गोव्यातील तियात्रिस्त समुदायाकडूनही आता वेलिंगकरांच्या अटकेची मागणी करण्यात आली आहे. सुभाष वेलिंगकर यांनी सेंट झेवियर यांच्याबाबत केलेली टिप्पणी ही निंदनीय आहे, तरीही वेलिंगकरांना वेळेत अटक करण्यात सावंत सरकार अपयशी ठरल्याचा आरोप त्यांनी केला.