पणजी : गोवा पोलिस खात्यात दहा अधीक्षकांच्या रिक्त असलेल्या जागा भरण्यासाठी तांत्रिक अडचण येत होती. मात्र राज्य सरकारच्या प्रस्तावाला गोवा लोकसेवा आयोगाने सेवा काळ शिथिल करण्यास मान्यता दिल्याने हा बढतीचा मार्ग मोकळा झाला आहे.

उपअधीक्षक मारिया मोन्सेरात, गुरुदास गावडे, एडविन कुलासो, नेल्सन अल्बुकर्क, सुचेता देसाई, एझिल्डा सापेको, सुनीता सावंत, राजू राऊत देसाई, धर्मेश आंगले, किरण पौडवाल यांना अधीक्षकपदी तर बिनतारी संदेशमधील निरीक्षक कृपासागर मरळकर यांना उपअधीक्षकपदी बढती मिळणार आहे.

दरम्यान, भीषण अपघातसत्रानंतर डिचोलीतही वाहतूक पोलिस विभाग गेल्या तीन-चार दिवसांपासून अधिक सक्रिय झाला आहे. मद्यपी आणि नियमांचे उल्लंघन करणाऱ्या वाहन चालका विरोधात वाहतूक पोलिसांतर्फे कडक मोहीम हाती घेण्यात आली आहे.

वाहतूक पोलिस विभागाचे निरीक्षक गौरीश मळीक यांच्या मार्गदर्शनाखाली पीएसआय आणि एएसआय अधिकारी यांच्या नेतृत्वाखाली वाहतूक पोलिस विभागाच्या कार्यक्षेत्रात ही मोहीम चालू आहे.