Bangaladeshi in Goa : गोव्यात गेल्या काही दिवसांमध्ये पोलिसांनी राज्यात बेकायदेशीरपणे राहणाऱ्या बांगलादेशी नागरिकांविरुद्धची मोहीम आणखी तीव्र केली आहे. गोवा पोलिसांच्या दहशतवाद विरोधी पथकाने (ATS) मेरशी येथे भाड्याच्या खोलीत राहणाऱ्या अशा 12 बांगलादेशी नागरिकांना ताब्यात घेतले आहे.

ताब्यात घेतलेल्या व्यक्तींची कोठडी ओल्ड गोवा पोलिसांकडे देण्यात आली आहे. ताब्यात घेतलेल्या बांगलादेशींना त्यांच्या निवासस्थानी स्थानबद्ध ठेवण्यात आले आहे. बांगलादेशी वंशाची संशयित दोन कुटुंबे मेरशी येथे भाड्याच्या खोलीत राहत असल्याची विश्वसनीय माहिती मिळाल्यानंतर एटीएसने तपास केला. त्यानंतर एटीएसच्या पथकाने घटनास्थळी भेट देऊन त्यांना ताब्यात घेतले.

ओल्ड गोवा पोलिसांनी अटक केलेल्यांची माहिती पुढील प्रक्रियेसाठी फॉरेनर्स रीजनल रजिस्ट्रेशन ऑफिस (FRRO) ला दिली आहे. सूत्रांनी सांगितले की, राज्यात विशेषत: खेड्यापाड्यात अनेक बांगलादेशी नागरिक व्यवसाय चालवत आहेत. काही दिवसांपूर्वीच हणजूण परिसरातून रेस्टॉरंट चालवणाऱ्या एका बांगलादेशी मायलेकाला ताब्यात घेण्यात आलं होतं.

राज्यात दहशदवादविरोधी पथक आणि पोलिसांच्या वतीने बांगलादेशींची शोधमोहीम सुरू झाली आहे. गेल्या महिन्याभरात 50 पेक्षा अधिकजणांना प्रतिबंधात्मक अटक करून त्यांच्या हालचालींवर निर्बंध आणून पोलिस नजरकैदेत ठेवण्यात आले आहे. हल्लीच काही महिन्यांपूर्वी दोन वर्षांपूर्वी अटक झालेले व पोलिस नजरकैदेत असलेले दोन बांगलादेशी फरारी झाले आहेत. त्यामुळे या प्रकरणावरून बांगलादेशींना नजरकैदेत ठेवण्यात येत आहे की तो फार्स आहे?, असा संशय लोकांकडून व्यक्त होत आहे.

वाळपई, आगशी, डिचोली, कोलवा, जुने गोवे या भागातून एटीएसने व त्यानंतर जिल्हा पोलिसांनी मुस्लिम असलेल्या परिसरात केलेल्या तपासणीत काही बांगलादेशी गेली अनेक वर्षे बनावट आधार कार्ड, निवडणूक कार्ड तसेच इतर राज्यातील घरांच्या खोट्या पत्त्यासह गोव्यात वास्तव्य करून असल्याचे उघड झाले आहे. व्हिसा नसलेल्या किंवा व्हिसा मुदत संपलेल्या विदेशी नागरिकांची पाठवणी होईपर्यंत त्यांना स्थानबद्ध करून ठेवण्यासाठी म्हापसा येथे केंद्र स्थापन करण्यात आले आहे. या केंद्रामध्ये काहीच सुविधा नसल्याने त्यांना पुढील कारवाई होईपर्यंत गोव्याबाहेर न जाण्याचे निर्देश पोलिसांनी दिली आहे. मात्र, आवश्‍यक असलेल्या मूलभूत गरजांचा अभाव आहे.

ताब्यात घेऊन निर्बंध लादून सुटका केलेल्या बांगलादेशींना त्यांच्या मुलाबांळासह ठेवण्याची सोय या केंद्रात नाही. तसेच या सर्वांचा खाण्यापाण्याचा प्रश्‍नही आहे. ते सविस्तरपणे व्हिसा घेऊन भारतात आलेले नाही तर त्यांनी घुसखोरी केली आहे. त्यामुळे त्यांची पाठवणी करण्यासाठी सर्वतोपरी माहिती जमा करण्यात येत आहे. बांगलादेशच्या राजदुतांशी संपर्क साधून या सर्वांची भारतातून पाठवण्याची प्रक्रिया पूर्ण करण्यात येणार आहे.