शिवोली: गोवा पोलिसांच्या अंमली पदार्थ विरोधी पथकाने अंमली पदार्थांविरोधात सुरु असलेल्या मोहिमेत मोठे यश मिळवले. शिवोली परिसरात एएनसी पथकाने धडक कारवाई करत एका नायजेरियन नागरिकाला बेड्या ठोकल्या. पोलिसांनी दिलेल्या माहितीनुसार, अटक करण्यात आलेल्या या नायजेरियन नागरिकाचे नाव चिगोजी इनोसेन्ट न्झेदिग्वे असे आहे. त्याच्याकडून तब्बल 2 कोटी 53 लाख रुपये इतक्या किमतीचे वेगवेगळ्या प्रकारचे अमली पदार्थ जप्त करण्यात आले.

मोठ्या किमतीचा मुद्देमाल जप्त

नायजेरियन तस्कर चिगोजी हा शिवोली (Siolim) परिसरात अंमली पदार्थांची तस्करी करत असल्याची गोपनीय माहिती एएनसी पथकाला मिळाली होती. या माहितीच्या आधारेच पोलिसांनी छापेमारी करुन त्याच्या अटकेसह मोठ्या किमतीचा मुद्देमाल जप्त केला. तपासणीदरम्यान त्याच्याजवळ विविध प्रकारचे अमली पदार्थ मोठ्या प्रमाणात आढळले. यामध्ये प्रामुख्याने कोकेन, एमडीएमए (MDMA), गांजा आणि इतर सिंथेटिक ड्रग्जचा समावेश आहे. जप्त केलेल्या ड्रग्जची किंमत गोव्यातील आतापर्यंतच्या मोठ्या जप्तींपैकी एक आहे.

चौकशीनंतर गुन्हा दाखल

एएनसी पथकाने चिगोजी इनोसेन्ट न्झेदिग्वे याला तात्काळ ताब्यात घेतले आणि कसून चौकशी केली. चौकशीअंती त्याच्यावर अमली पदार्थ विरोधी कायद्यांतर्गत (NDPS Act) गुन्हा नोंदवण्यात आला. गोव्यात पर्यटनाच्या नावाखाली होणाऱ्या ड्रग्ज तस्करीच्या घटनांवर लगाम घालण्यासाठी गोवा पोलिसांनी (Goa Police) कठोर पाऊले उचलली आहेत. या कारवाईमुळे गोव्यातील ड्रग्ज तस्करांच्या रॅकेटला मोठा धक्का बसला. सध्या पोलीस या नायजेरियन तस्कराचे स्थानिक आणि आंतरराष्ट्रीय कनेक्शन शोधण्यासाठी अधिक तपास करत आहेत.