Goa Police in Delhi: दिल्लीतील पोलिस प्रशिक्षण केंद्रात दाखल झालेल्या गोव्यातील पोलिस प्रशिक्षणार्थ्यांचा आहाराचा प्रश्‍न सुटला आहे. त्यांचा मेनू ठरवण्यासाठी केंद्राने एक समिती स्थापन केली आहे. त्यामुळे या गोव्यातील प्रशिक्षणार्थ्यांना गोमंतकीय आहाराचा (मत्स्याहारी) मेनूमध्ये समावेश करण्यात आला आहे.

प्रशिक्षण काळात काहींना त्रास झाला. मात्र कालांतराने ते वातावरणाशी जुळवून घेतील, अशी माहिती एका वरिष्ठ पोलिस अधिकाऱ्याने दिली.

या केंद्रात दाखल झालेल्या सर्व राज्यांतील प्रशिक्षणार्थ्यांना एकाच प्रकारचा आहार दिला जातो. त्यामुळे गोव्यातून गेलेल्या प्रशिक्षणार्थ्यांना आहारातील बदलामुळे अपचन होऊन आरोग्यावरही परिणाम झाला.

त्यातील काहींना ताप आल्याने इस्पितळात दाखल करण्याची वेळ आली. त्यामुळे गोमंतकीय प्रशिक्षणार्थ्यांना शाकाहारासह मांसाहार देण्यासाठी एक समिती स्थापन केली आहे. प्रशिक्षणार्थी व केंद्राच्या अधिकाऱ्यांशी चर्चा करून पोलिस महानिरीक्षक ओमवीर सिंग बिष्णोई यांनी या प्रश्‍नावर तोडगा काढला.