मद्यधुंद अवस्थेत एका कारचालकाने तीन वाहनांना धडक दिल्याची घटना आज सावंतवाडी येथे घडली. धडक दिल्यानंतर मद्यधुंद अवस्थेतील ( drunk and drive ) रेंज रोव्हर चालक आंबोलीच्या दिशेने पळून गेला. मात्र, आंबोलीत फॉरेस्ट चौकीलगत एका पोलला त्याच्या कारची धडक बसल्यानंतर आंबोली (Amboli) पोलिसांनी त्याला ताब्यात घेतले.

दरम्यान, ताब्यात घेण्यात आलेला संशयित हा मूळ गुजरात येथील असून तो सध्या गोव्यात राहत होता. तसेच त्याच्या ताफ्यातील रेंज रोव्हर कार गोवा पासिंग असल्याचे समोर आले आहे.

याबाबत अधिक माहिती अशी की, आंबोली पोलिसांनी ताब्यात घेतलेला संशयित करण विमलेश आहेर ( २६, मूळ गुजरातचा सध्या रा. गोवा ) गोवा पासिंग रेंज रोव्हर कार घेवून झाराप येथून सावंतवाडी मार्गे आंबोलीच्या दिशेने वेगाने जात होता. यावेळी तो सावंतवाडी येथे आला असता त्याने दोन दुचाकी व कारिवडे येथे एका कारला धडक दिली. 

दरम्यान धडक दिल्यानंतर संशयित आंबोलीच्या दिशेने पळून जात असताना महादेवगड तिठ्यावर असलेल्या चेकपोस्टलगत एका खांबाला त्याने जोरदार धडक दिली. याबाबतची माहिती स्थानिकांनी सावंतवाडी पोलिसांना दिली होती.

त्यानंतर संशयिताला पोलिसांनी आंबोलीत ताब्यात घेतले. यावेळी संशयित कारचालक मद्यधुंद असल्याचे आढळून आले. पोलिस पुढील तपास करीत आहेत.