Goa News: आपल्या दैनंदिन व्यवहारात आरोग्याला अनन्यसाधारण महत्त्व आहे आणि मातृभूमी सेवा प्रतिष्ठान, गोवा ही संस्था आरोग्याला प्राधान्य देत आली आहे, असे केंद्रीय मंत्री तथा मातृभूमी सेवा प्रतिष्ठानचे अध्यक्ष श्रीपाद नाईक यांनी काढले.

दिवाळी पाडव्याचे औचित्य साधून श्रीपाद नाईक यांच्या यांच्या सापेंद्र-ओल्ड गोवा येथील निवासस्थानी वर्ष पद्धतीप्रमाणे श्री सत्यनारायण महापूजेचे आयोजन करण्यात आले होते. याप्रसंगी मोफत चष्म्यांच्या वितरणाचा कार्यक्रम ठेवण्यात आला होता.

तसेच, यावेळी पीआयबी गोवा विभागाचे उपसंचालक गौतम कुमार, उत्तर गोवा जिल्हा पंचायत अध्यक्ष सिद्धेश नाईक, खोर्लीचे माजी सरपंच शिवा नाईक आदी मान्यवर उपस्थित होते. दरम्यान, लवकरच केएलई या वैद्यकीय क्षेत्रातील अग्रगण्य आस्थापनाच्या सहकार्याने उत्तर गोव्यात २० ठिकाणी आरोग्यविषयक भव्य शिबिरांचे आयोजन करण्यात येणार असल्याची माहिती मातृभूमी सेवा प्रतिष्ठानचे सचिव सूरज नाईक यांनी दिली.

25 हूनही अधिक शिबिरे

गेल्या चार वर्षांत मातृभूमी सेवा प्रतिष्ठानतर्फे गोव्याच्या विविध भागांत 25 हूनही अधिक नेत्रचिकित्सा आणि शस्त्रक्रिया शिबिरांचे आयोजन करण्यात आले असून 18 हजारांहूनही अधिक चष्म्यांचे वितरण करण्यात आले आणि डोळ्यांच्या एक हजारांहूनही अधिक यशस्वी शस्त्रक्रिया करण्यात आल्या. प्रसाद नेत्रालय, उडुपी, ईस्सिलोर, बंगळुरू आणि जेकेबी यांच्या सहकार्यामुळे मातृभूमी सेवा प्रतिष्ठानला ही जनसेवा करणे शक्य झाले.