Goa Pollution: गोव्याची संस्कृती इथल्या मातीशी निगडित आहे. त्यामुळे गोमंतकाच्या सांस्कृतिक ठेव्यात गोवा आणि इथल्या मातीशी निगडित सण, उत्सव, परंपरा हा मोठा वारसा आहे. तो जपा, त्याचे संवर्धन होण्यासाठी कार्यशाळा राबवा. विशेष म्हणजे आज संस्कृती प्रदूषण मोठ्या प्रमाणात वाढत आहे, ते रोखण्यासाठी प्रयत्नशील व्हा, असे आवाहन ‘पद्मश्री’ विनायक खेडेकर यांनी केले.

पर्वरी सम्राट क्लबच्‍या अधिकारग्रहण सोहळ्‍यात खेडेकर बोलत होते. सुकूर पंचायत सभागृहात आयोजित या कार्यक्रमाला आमदार तथा पर्यटनमंत्री रोहन खंवटे प्रमुख पाहुणे म्हणून उपस्थित होते. तसेच सूकुर सरपंच सोनिया पेडणेकर, सम्राट क्लब इंटरनॅशनलचे राज्य अध्यक्ष शैलेश बोरकर, गटाध्यक्ष संजय वालावलकर, मावळत्या अध्यक्ष रश्मी हळदणकर, नूतन अध्यक्ष राजमोहन शेट्ये, उपसरपंच माया केणी, पंच साची मांद्रेकर, सर्वेश हळर्णकर, राजन पार्सेकर यांचीही उपस्थिती होती.

रश्मी हळदणकर यांनी स्‍वागत केले तर सचिव रिया राणे यांनी वार्षिक अहवाल सादर केला. संजय वालावलकर यांनी नवीन सम्राट सदस्यांना शपथ दिली. शैलेश बोरकर यांनी नूतन संचालक मंडळाला शपथ दिली. आरती गावडे यांनी स्वागतगीत सादर केले. सूत्रसंचालन गिरीश साळगावकर यांनी केले तर उषा पुनाजी यांनी आभार मानले.

रोहन खंवटे, पर्यटनमंत्री तथा आमदार-

पर्वरी सम्राट क्लबचे कार्य कौतुकास्‍पद आहे. त्‍यामुळे रसिकांमध्ये उत्साह संचारतो, सकारात्मक ऊर्जा निर्माण होते. म्‍हणूनच सम्राट क्लब हा गोव्याच्या सांस्कृतिक चळवळीचा एक प्रमुख स्त्रोत म्हणावा लागेल. या क्‍लबच्‍या कार्याला माझ्‍या शुभेच्‍छा. तसेच आपली सांस्कृतिक चळवळ उत्साहाने पुढे चालविण्यास क्लबला माझे पूर्ण सहकार्य असेल.