मडगाव : गोव्यात पंचायतीच्या निवडणुका 45 दिवसात घ्या, असा मुंबई उच्च न्यायालयाने जो निकाल दिला आहे त्याचे काँग्रेसचे कार्याध्यक्ष युरी आलेमाव यांनी स्वागत केले आहे. लोकशाहीने दिलेले अधिकार मिळविण्यासाठी लोकांना न्यायालयात धाव घ्यावी लागणे दुर्दैवी असल्याचे आलेमाव यांनी म्हटले आहे.

मुंबई उच्च न्यायालयाने दिलेल्या निर्देशात या संबंधी 3 दिवसात अधिसूचना जारी करावी असे म्हटले आहे. निवडणूक वेळेवर घेणे ही राज्य निवडणूक आयोगाची जबाबदारी आहे. निवडणूक आयोगासारख्या स्वतंत्र अधिकारिणीवर सरकारचे दडपण चालते हे उच्च न्यायालयाच्या निवड्याने स्पष्ट केले आहे. या आयोगाने निःपक्षपातीपणाने निर्णय घेऊन आपली संविधानिक जबाबदारी पार पाडायची असते याकडे आलेमाव यांनी लक्ष वेधले आहे.