Panaji Traffic News: सध्या राजधानीत गटारे, पदपथांसाठी रस्त्याच्या दोन्ही बाजूला सुरू असलेले खोदकाम, भर रस्त्यात खोदलेले रस्ते तसेच इफ्फी महोत्सवानिमित्त शहरात वाढलेली रहदारी यामुळे स्मार्ट सिटी ही केवळ नावापुरतीच उरली आहे. वाहतूक कोंडीमुळे येथे आता चालणेदेखील अश्यक्यप्राय होत आहे. रस्ता ओलांडून पलीकडे जायचे म्हटले तरी वाट मिळणे मुश्‍कील झाले आहे.

राजधानी पणजीतील बहुतांशी भागात कोणते ना कोणते काम सुरू आहे. राजधानीचा विकास व्हावा मात्र त्यासाठी नियोजन महत्त्वाचे आहे. अनेक ठिकाणी काम सुरू असल्याने रस्ते बंद केले आहेत. अनेकांना त्याची कल्पना नसल्याने अधिकच वाहतूक कोंडी होते.

पोलिसांची नेमणूक करावी

वाहतूक पोलिस असतील तर शक्‍यतो वाहतूक कोंडी होत नाही. मात्र, पोलिस नसतील तर बेशिस्‍तपणे पार्किंग केले जाते. याचा त्रास मग इतर वाहनचालकांसह पादचाऱ्यांनाही सोसावा लागतो. वाहतूक कोंडी होणाऱ्या ठिकाणी नियमितपणे पोलिसांची नेमणूक करावी, अशी मागणी वाहनचालकांतून होत आहे.

"पणजीत सर्वत्र पालिकेद्वारे खोदकाम सुरू आहे, त्यामुळे सर्वसामान्य नागरिकांना देखील मोठ्या प्रमाणात अडचणींचा सामना करावा लागत आहे. या खोदकामांंमुळे एक किलोमीटर असलेल्या अंतरावरील ठिकाणी जाण्यासाठी चार किलोमीटरचा वेढा घालून जावे लागत आहे, त्यामुळे कोणतेही काम अर्धवट सोडून दुसऱ्या कामाला सुरवात करू नये."

- उदय शिरोडकर

"पणजीत अनेक ठिकाणी काही व्यापारी आपले साहित्य फुटपाथावर ठेवतात. त्याप्रमाणे शहरी भागात खोदकामामुळे रस्ता बंद केला आहे. मात्र, तो केव्हापर्यंत बंद असणार याची कल्पना नाही. महानगरपालिका, वाहतूक विभाग आणि रस्त्याचे काम करणाऱ्यांमध्ये योग्य प्रकारचे नियोजन होणे गरजेचे आहे."

- रोलंड मार्टिन्स