Monsoon Assembly Session: येत्या 18 जुलैपासून विधानसभेच्या पावसाळी अधिवेशनाला सुरुवात होणार आहे. हे अधिवेशन राज्यातील महत्वाच्या प्रश्नांवर आधारित असणार आहे. त्यामुळे विरोधी पक्ष विविध मुद्द्यांवरून सरकारला घेराव घालण्यासाठी पूर्ण तयारी करत आहेत.

याच अनुषंगाने रणनीतीवर चर्चा करण्यासाठी आज विरोधी पक्षनेते युरी आलेमाव यांच्या चेंबरमध्ये सात विरोधी आमदारांची बैठक पार पडली.

या बैठकीला युरी आलेमाव, विजय सरदेसाई, वेंझी व्हिएगस, कार्लोस फरेरा, विरेश बोरकर, अल्टोन डिकाॅस्टा आणि क्रुज सिल्वा असे एकूण सात विरोधी आमदार उपस्थित होते.

यामध्ये अधिवेशनात मांडण्यात येणाऱ्या मुद्द्यांवर चर्चा करण्यात आली असून विरोधी पक्ष आपली एकजूट अधिकच भक्कम करण्यासाठी प्रयत्नशील असल्याचे दिसून येत आहे.

दरम्यान, येत्या पावसाळी अधिवेशनात म्हादई, खाण व्यवसाय, कायदा व सुव्यवस्था, महागाई आणि रोजगार हे विषय सत्ताधाऱ्यांना घेरण्यासाठी महत्त्वाचे असतील, असे परखड मत विरोधी पक्षनेते युरी आलेमाव यांनी व्यक्त केले होते. त्यामुळे अधिवेशनात भाजप सरकारला उघडे पाडणे आणि कामकाजाची रणनीती ठरवणे, हाच आजच्या बैठकीचा मुख्य अजेंडा होता.

या अधिवेशनासाठी विधानसभा सदस्यांकडून तारांकित आणि अतारांकित प्रश्न मागविले आहेत. गोवा विधानसभा सचिवालयाने जारी केलेल्या अधिसूचनेवर प्रतिक्रिया देताना विरोधी पक्षनेते युरी आलेमाव म्हणाले की, सरकारला विरोधकांची भीती वाटते. त्यामुळेच कामकाजाचे वेळापत्रक केवळ १८ दिवसांचे केले आहे.

गोवा विधानसभेच्या अधिवेशनाचा काळ नेहमीच कमी केला जातो, असे सांगत गोवा फॉरवर्डचे आमदार विजय सरदेसाई यांनी हे सरकार लोकशाहीला मानत नाही का? असा सवालही उपस्थित केला होता. या अधिवेशनात नेमकं काय - काय पाहायला मिळणार याकडे सगळ्यांचे लक्ष लागून राहिले आहे.