पणजी: ज्वलनशील गवत वेळेत न काढल्यामुळे राज्यभरात सुक्या गवताला आग लागण्याच्या घटनांत वाढ झाली आहे. दरवर्षी नोव्हेंबरमध्ये अशा आगी लागण्यास सुरवात होते, यंदा त्याचे प्रमाण वाढले आहे.

शनिवारी एकाच दिवशी सहा ठिकाणी अशा आगीच्या घटनांची नोंद झाली आहे. खांडोळा येथील सरकारी महाविद्यालयालगतच्या गवताला सायंकाळी ७ वाजण्याच्या सुमारास आग लागली. खोर्ली म्हापसा येथील प्रभू इमारतीजवळील सुक्या गवतास सायंकाळी पाच वाजता आग लागली होती. बेतकी येथे दुपारी ४ वाजता सुक्या कचऱ्यास आग लागली होती.

दुपारी सव्वा वाजता सुर्ल घाडीवाडा येथील सरकारी शाळेजवळीस सुक्या गवताने पेट घेतला होता. शिरसई कोमुनिदाद सभागृहाजवळील गवताला आज दुपारी साडेबारा वाजता आग लागली होती. सकाळी १०.३० वाजता बांबोळी येथील अन्न व औषध प्रशासन इमारतीजवळील सुके गवत पेटले होते.

दरम्यान, आगरवाडा येथील लक्ष्मी ट्रेडर्स या मंदार पोके यांच्या हार्डवेअर दुकानाला शनिवारी सायंकाळी आग लागली. वेळीच आगीवर नियंत्रण मिळवल्याने किरकोळ नुकसान झाले. दुकान बंद करून मंदार पोके नुकतेच गेले होते मात्र, दुकानातून धूर येत असल्याचे शेजारील महादेव यांच्या लक्षात आले त्यांनी लागलीच मंदार पोके यांच्याशी संपर्क साधून माहिती दिली.

पोके यांनी लगेच पेडणे अग्निशामक दलाशी संपर्क साधला. जवानांनी तातडीने आग विझवली. यासाठी डॉम्निक मार्टिन, विकास चव्हाण, प्रमोद गवंडी, शेखर मयेकर, अमित सावंत, राजेश परब, शुभम कामत यांनी विशेष कामगिरी बजावली.