पिसुर्ले: राज्यातील ओबीसी समाजात येणाऱ्या एकूण १९ समाजांवर होत असलेला अन्याय व त्यांच्या समस्या राष्ट्रीय पातळीवर अमृतसर पंजाब येथील गुरू नानक देव विद्यापीठ येथे झालेल्या राष्ट्रीय ओबीसी महासंघाच्या ९ व्या मेळाव्यात मांडल्या आहेत. त्यांची दखल निश्‍चितपणे राष्ट्रीय पातळीवरील ओबीसी नेते घेणार आहेत, अशी माहिती राष्ट्रीय ओबीसी महासंघाच्या गोवा शाखेचे अध्यक्ष मधू नाईक यांनी दिली आहे.

मधू नाईक म्हणाले की, आपल्यासह गोवा शाखेचे मुख्य सचिव सर्वेश बांदोडकर, दामोदर नाडार, डॉ. दीक्षा नाडार, डॉ. श्रध्दा नाईक, डॉ. प्राची नाईक यांनी बुधवार,७ रोजी झालेल्या या मेळाव्यात सहभागी झाले. त्यामुळे इतर राज्यातील ओबीसी समाजाच्या समस्या व अडचणी समजून घेण्याची संधी उपलब्ध झाली आहे. त्याच प्रमाणे गोव्यातील ओबीसी समाजाला कशा प्रकारे संविधानाने प्रदान करून दिलेल्या योजनांपासून वंचित राहावे लागत आहे, या संदर्भात सविस्तर माहिती या महामेळाव्याच्या माध्यमातून प्राप्त झाली.

यावेळी राष्ट्रीय ओबीसी महासंघाचे अध्यक्ष बबनराव तायवाडे, मुख्य सचिव सचिन राजुरकर यांनी गोव्यातील शिष्टमंडळाचे स्वागत करून, ओबीसी समाजाला भेडसावणाऱ्या समस्यांना वाचा फोडण्याचे काम राष्ट्रीय ओबीसी महासंघाच्या माध्यमातून निश्‍चित केले जाईल, असे आश्वासन यावेळी देण्यात आले. या महामेळाव्याला देश भरातून विविध ओबीसी समाजाचे प्रतिनिधि उपस्थित होते असे शेवटी मधू नाईक यांनी सांगितले.