काल रात्रीपासून गोवा राज्यात पावसाने जोरदार हजेरी लावली आहे. त्यामूळे राज्यातील अनेक भागात पाणी रस्त्यावरून वाहू लागले आहे. तसेच अनेक घरात पाणी शिरण्याचे प्रकार घडले आहेत. या पार्श्वभूमीवर कुडचडे येथील आंबेडकर चौकाजवळ यंदाही पाणी रस्त्यावर भरून वाहत आहे. यामूळे वाहनचालकांना आपली वाहने पाण्यातून काढावी लागत आहेत. (Goa News: Ambedkar Chowk under water at Kudchade )

आंबेडकर चौकाजवळ रस्त्यांचे रुंदीकरण करताना पावसाच्या पाण्याचा निचरा होण्यासाठी नीट व्यवस्था न केल्याने दर वर्षी केपेला जाणारा रस्ता पाण्याखाली जात असल्याने वाहनचालकांना त्रास होतो. प्रशासन येथे काही जीवित हाणी होण्याची वाट पाहते आहे का ? असा प्रश्न आता नागरिक विचारु लागले आहेत. दरवर्षी रस्ता पाण्याने बुडत असल्याचे दिसून सुद्धा यावर कोणतीच उपाययोजना न केल्याने नागरिकातून संताप व्यक्त केला जात आहे.

याविषयी नगराध्यक्षा जासमीन ब्रागंझा यांना विचारले असता, त्यांनी पाऊस मोठा पडला की, या रस्त्यावर पाणी येत असल्याचे मान्य केले. पाण्याचा निचरा होण्यासाठी ठेवलेल्या वाटेवर कचरा अडकल्याने रस्त्यावर पाणी आले असल्याचे त्यांनी सांगितले. ब्रागंझा यांनी सदर रस्त्याची पाहणी करून जे सी बी आणून पाण्याची वाट मोकळी केली असल्याचे त्यांनी सांगितले. यावर आपण आवश्यक तो तोडगा काढण्यासाठी प्रयत्न करणार असल्याचे त्यांनी सांगितले.