हळदोणे: सिद्धी नाईक मृत्‍यूप्रकरणाचे (Murder Case) गूढ दिवसेंदिवस वाढतच आहे. आता शवचिकित्‍सा अहवालाचा तज्‍ज्ञ समितीकडून फेरआढावा आणि ‘सीबीआय’ (CBI) चौकशी हे दोनच पर्याय सरकारसमोर (Goa Government) उपलब्‍ध आहेत. डॉक्‍टरांनी केलेल्‍या शवचिकित्‍सेबाबतच्‍या हलगर्जीपणामुळे तपासासाठी आवश्‍‍यक अनेक पुरावे आता नष्‍ट झाले आहेत.

त्‍यामुळे तयार केलेला शवचिकित्‍सा अहवाल चार न्‍यायवैद्यक तज्‍ज्ञ डॉक्‍टरांच्‍या मदतीने नव्‍याने फेरअहवाल बनविला जाऊ शकतो. गोवा पोलिसांनीसुद्धा या प्रकरणाच्‍या तपासामध्‍ये केलेल्‍या त्रुटी भरून काढण्‍यासाठी हे संपूर्ण प्रकरण सीबीआयकडे देण्‍याच्‍या हालचालीही सुरू झाल्‍याची माहिती मिळाली आहे.

जस्टीस फॉर सिध्दी नाईक मोहिम

आपल्‍या ग्रामक्षेत्रात सिद्धी नाईकवर घडलेले अघटित हे अत्‍यंत वाईटच आहे. अशा घटनेची राज्‍यातच नव्‍हे, तर देशात कुठेही पुनरावृत्ती होऊ नये. त्‍यामुळे पोलिसांनी सखोल चौकशी करून नाईक कुटुंबियांना न्‍याय द्यावा. सिद्धीच्‍या मृत्‍यूचेही नेमके कारण स्‍पष्‍ट व्‍हावे व पारदर्शकपणे पोलिस चौकशी व तपास व्‍हावा अशी मागणी मयडेचे सरपंच गोविंद गोवेकर यांनी केली आहे.