Goa Monsoon Update: गोव्यामध्ये जून महिन्याच्या सुरवातीच्या दिवसांमध्ये गायब झालेल्या पावसाने जूनच्या शेवटाकडे येताना चांगलाच जोर धरला आहे. गेल्या सात दिवसांमध्ये राज्यात एकूण 392 मिलीमीटर पाऊस झाला आहे. 23 जूनपासुनच्या सात दिवसातील ही आकडेवारी आहे.

(IMD Goa)

दरम्यान, गेल्या दोन दिवसांत गोव्यासह कोकण किनारपट्टीला पावसाने झोडपून काढले आहे. आज, शुक्रवारी देखील भारतीय हवामान विभागाने गोव्यात पावसाचा ऑरेंज अलर्ट दिला आहे. राज्यात शुक्रवारी जोरदार ते अति मुसळधार पाऊस होण्याचा अंदाज आहे.

या आठवड्यातील पाऊसमानाचा विचार करायचा झाल्यास बुधवारी सकाळी हंगामातील सर्वाधिक 146 मिमी पाऊस झाला. त्यानंतरच्या 24 तासात म्हणजे गुरूवारी सकाळी राज्यात सरासरी 56.1 मिमी पावसाची नोंद झाली.

या जोरदार पावसामुळे गुरुवारी सकाळी मान्सूनची तूट 39 टक्के टक्क्यांवरून 35.1 टक्क्यांवर आली. तर बुधवारी सकाळपर्यंत झालेल्या पावसाने पावसाती तूट 54 टक्क्यांवरून 39 टक्क्यांपर्यंत कमी झाली. या हंगामात जून मधील एकूण पाऊस आता 565.7 मिलीमीटर झाला आहे. तर एरवी गोव्यात या काळात 871.8 मिलीमीटर पाऊस पडत असतो.

गोव्यातील पेडणे (75.8 मिमी), फोंडा (75.4 मिमी), सांगे (70.2 मिमी) आणि मडगाव (68 मिमी) येथे अतिवृष्टीची नोंद झाली. इतर केंद्रांपैकी पणजीमध्ये 61.2 मिमी (बुधवारी 202.9 मिमीच्या तुलनेत), काणकोण येथे 55.6 मिमी, ओल्ड गोवा येथे 48 मिमी, मुरगाव येथे 46 मिमी आणि इतर केंद्रांमध्ये कमी प्रमाणात पाऊस झाला.

दरम्यान, उत्तर गोवा आणि दक्षिण गोवा जिल्ह्यात मध्यम ते अति मुसळधार पावसाचा अंदाज गोवा वेधशाळने वर्तवला आहे. शुक्रवारी 30 जूनसह आगामी जुलै महिन्यातील पहिल्या तीन दिवसांसाठी हा अंदाज वर्तवण्यात आला आहे.